A Manca vole pricisà e cundizione di a so participazione à a manifestazione ch’ellu prupone u Rinnovu contr’à u blucchime di u Statu francese di pettu à e rivindicazione purtate da l’eletti tarrituriali vinuti da una parte di u muvimentu naziunale.
Accunsintemu à participà à una manifestazione urganizata nant’à fundamenti dimucratichi cum’è l’amnistia o l’avvicinanza di i prigiuneri, a cuuficialità è à quistione di u putere legislativu.
.Ma pà ciò chì tocca à l’altre rivindicazione, à contu nostru, patriotti anticapitalisti corsi, ùn si pò manifestà à prò di misure liberale cum’è quella di u statutu fiscale o di u statutu di risidente. Ste misure fondanu un prugettu di sucietà oppostu in tuttu à a nostra dimarchja è andatura pulitica postu ch’ellu s’agisce di sustene rivindicazione di classa à favore di a sola burghesia corsa.
S’omu cerca à piglià in cunsidarazione a pruposta di parechji membri di Femu a Corsica, chì si dicenu primurosi d’apre a riunione priparatoria à parsone o gruppi «ch’ùn appartenenu micca à u muvimentu naziunale », ci pare obligatoriu di sapè prima di tuttu nant’à chì puntelli pulitichi pricisi s’arrimbanu sti candidati à a participazione.
Pà cunclude, ci pare impurtantissimu di fà vi sapè di modu chjaru chè no ricusaremu d’ingaggià ci inde a dimarchja chè vo avete messu in ballu s’elli ci participeghjanu parsone o gruppi cunnisciuti cum’è militanti indiati à a strema dritta, ch’elli sianu o nò membri d’urganisazione dette patriottiche.
Spirendu d’avè cuntribuitu à rende u dibattitu da vene più ghjuvativu,
Tanti saluti militanti,
Produit CORSU E RIBELLU
