Infini dopa 40 anni di strazii, cuminciati in Aleria u 23 d’austu di u 1975, u 13 dicembri di l’annu di grazia di u 2015 i Corsi anni purtatu a l’assemblea di Corsica una magiuranza naziunali.
Millai di parsonni so scesi da soli in carrughju trà pievi, paesi è cità…U soffiu di a storia hà scuzzulatu u mondu anzianu. L’attori ni fù u populu corsu chi fessi a scelta di sustena a lista naziunalista Pe a Corsica prisintata l’ottu di dicembri di fronti a u Palazzu naziunali di Corti. U 13 di dicembri a scelta fù chjara è senza discussioni.
U ghjovi 18 in Aiacciu firmarà in la memoria l’alizzioni di i presidenti di l’assemblea è di l’esecutivu, u Diu ripresu cù una sulenità tramenda da u publiccu, u ghjudiccamentu di pettu à a Ghjustificazioni di l’abbate Salvini, l’uscita di i presidenti a mezzu a u populu… ghjovani è vechji ziteddi o militanti di sempri ch’anni campatu pà veda issu mumentu. E à puddarani dì : iè c’eru l’aghju fatta, l’avemu fatta tutti insemi.
Pà nò, Associu di i Parenti Corsi natu in lu 1984 cù u STC pà a dicisioni di u front di liberazioni naziunali d’uccupà u tarrenu di i contra puteri, hè dinu a noscia vittoria. Avemu criscutu trà 1984 è 1995 po so ghjunti l’anni di stirpera fratricidda. L’associu hè ricuminciatu in li 2002 pà duvintà à pocu à pocu magiuritariu da partuttu da anni dighjà. Avemu vintu cù i nosci sbagli a noscia fedi è i nosci ziteddi. Pà iddi femucci l’avvena una altra sfida c’aspetta avà..mà di sicuru avemu varcatu una sarra longu un chjassu di 40 anni.
Evviva a nazioni corsa, evviva u populu corsu chi a i tempa landani d’induva veni a truvatu a forza à l’orlu di u XXIu seculi di vincia pà lampà issu raghju di vità.
U Prisidenti
Diunisu Luciani
Produit CORSU E RIBELLU
