(CorseMatin) Hè sempre un piacè di sente à Ceccè Hollande. Sapete, quellu tippu chì ne dice quant’è i libri ma chì scrive d’inchjostru biancu. Ghjovi scorsu, durante a cunferenza nant’à l’ambiu à l’Elysée – o u reame di u traparlime, sceglite voi – n’hà fattu torna una. Serà perchè chì hè turnatu écolo ? Ùn si sà propiu.
Ammintendu u drama di Sivens, hà chersu un ricorsu à i riferendi lucali quandu… i prugetti d’accunciamentu di u territoriu fermanu in situazione di ‘bluccasgiu’. Hè statu bellu avvidutu cù a formula, vistu chì sti pochi tempi in Francia blocca in ogni locu – o guasi – tandu ùn ci surteria… Era solu qualchì parolla per l’eculugisti, da mette li in core l’allegria. Sò d’isse stonde chì traccianu l’idee è i cuntrasti…
Oramai u guvernu vole fà di più sforzi da fà participà i citadini à l’elaburazione di a decisione publica. Ciò chì pone di fatti a quistione di a raprisentatività di l’eletti. Hè tandu chì ci hè dinù… a Corsica. Ùn scriveriamu micca ‘tante razze malavviate’, cum’è a dice a canzona.
Produit CORSU E RIBELLU
