Riprisentente di l’esecutivu di Corsica Libera in Edinburgu, Sébastien Quenot risponde à e quistione di U Ribombu : identità, alternativa sociuecunomica, postculunialisimu, sumiglie cù a Corsica, tante quistione visticate cun ellu…
U Ribombu Internaziunale : Site andatu in Scozzia. Perchè ?
Sébastien Quenot : A Scozzia, quelli di a mo generazione, l’avemu cunnisciuta cù i filmi è cù u rugbì duve ella hè nazione. U più à fà ci sunnià serà statu Braveheart. Filmu di storia, podassi rumanticu è appena semplice, William Wallace era diventatu u nostru Paoli di l’highlandi. Dopu, un filmu più realistu cum’è Rob Roy ci hà dettu tutta a cumplessità di a quistione. L’affresca suciale Trainspotting hà finitu di scrive a Scozzia in a postmudernità. Cridiamu allora appena niscentri è pessimisti, ch’ella era compia a so storia. A tenuta di u referendum, u primu di stu tippu, era segnu ch’ella turnava a Scozzia à scrive u so destinu, è u nostru dinù, in un Europa in pace chì ci tocca à ammanì. Quessa, ùn la pudiamu micca mancà !
U Ribombu Internaziunale : Cumu sò ghjunti à avè un referendum ?
Sébastien Quenot : Dopu a vittoria di u Scottish National Party à u Parlamentu d’Edinburgu in u 2011, David Cameron hà prupostu, credu più per dispettu chè per demucrazia, un referendum nant’à l’indipendenza. Vulia fà vede ch’elli eranu assai stretti cù l’Inglesi i Scuzzesi. Malgratu a maiurità assuluta di u SNP à u Parlamentu, u « Yes » hè partutu assai in ritardu, trà 20% è 30% d’upinione favurevule. Nimu cridia à una vittoria.
U Ribombu Internaziunale : Ma l’ultime simane, ancu David Cameron cridia à a vittoria di u Yes.
Sébastien Quenot : Durante tutta a campagna eletturale, u « No » era propiu luntanu, ma ogni mese, crescia u « Yes » in i sundami. Tuttu hè cambiatu cù i dibattiti, d’agostu, quandu Alex Salmond u capizzone di l’indipendentisti di u SNP hà fattu valè una più grande maestria di u sughjettu è tanti argumenti ricunisciuti ancu da l’unionisti. Tandu hè cresciutu u « Yes », dendu a pussibilità d’una vittoria storica à l’indipendentisti.
U Ribombu Internaziunale : Chì ci serà di cumunu trà a Corsica è a Scozzia. Sò dui paesi assai luntanu unu da l’altru ?
Sébastien Quenot : Quandu si parte à scopre un paese, s’ampara sempre assai nant’à sè stessu è nant’à u soiu u paese. U paese visitatu, ùn si pò micca cunosce bè in quattru è trè sette ma ci pone tante quistione nant’à a nostra andatura. Sò da sviluppà sti scambii. L’Università di Corsica puderebbe forse generalizà un simestru o un annu di studiu fora, fendu scambii in Europa o cù paesi più luntani. Serebbe bè per ella, per a fama di a nostra isula è per a furmazione linguistica è intellettuale di i giovani dinù.
U Ribombu Internaziunale : Cosa v’anu dettu i Scuzzesi ? Avete trovu sumiglie ?
Sébastien Quenot : Per e sumiglie trà i dui, ùn sò ancu pulitiche. Per avà sò piuttostu storiche è psiculogiche. Manchemu di cunfidenza in noi stessi, ma attempu cridimu à l’indipendenza di l’altri. In Corsica, quante ghjente opposte à a nostra indipendenza si sò dette per quella di a Scozzia ? Hè listesa quallà ! Mi dicianu : « No Independence for Scotland but Yes for Corsica ». Per elli, a Corsica ghjè un paradisu. Digià, ghjè un isula. Un isula ricca di paisaghji per u turisimu è bagnata di sole per l’energie rinnuvevule. Ci anu dettu ch’ellu valia di più u nostru sole chè u so petroliu. Sti discorsi, ùn l’averiamu micca intesi solu 10 anni fà. Ghjè un segnu d’evuluzione pulitica.
U Ribombu Internaziunale : A campagna per l’indipendenza parlava di guvernenza, di suciale è d’ecunumia. È l’identità ?
Sébastien Quenot : Alex Salmond è u SNP difendenu a lingua è a cultura scuzzese. Quale serebbe à pudè la nigà ? Eppuru, durante a campagna, l’identità ghjera un tema accustatu piuttostu da l’unionisti. Parlavanu di a difesa di u Reame Unitu, di u so campà inseme « better together ». L’indipendentisimu scuzzese interrugheghja l’Inglesi nant’à u sensu di l’unione è di ciò ch’elli ponu sempre sparte inseme. Invece i Scuzzesi sanu bè quale elli sò !
U Ribombu Internaziunale : Ma cosa volenu ?
Sébastien Quenot : Per u restu, l’indipendentisimu scuzzese ùn hè micca propiu un naziunalisimu. Ci trova e so radiche ma s’hè sviluppatu. Si tratta di difende l’eserciziu di a so libertà è di u so ragiunamentu per una cumunità chì si ricunosce stu dirittu, sta vulintà è sta capacità. U so indipendentisimu ghjè un eurupeisimu. Serà pò esse una visione nova d’un Europa chì si cerca à pasponi.
U Ribombu Internaziunale : Allora l’indipendentisimu, sarà una quistione d’orgogliu ?
Sébastien Quenot : D’orgogliu diceranu certi, eiu diceraghju d’umanisimu è di dignità. Ùn la possu micca dì megliu chè Aimé Césaire in a so lettera à Maurice Thorez : « on comprend que nous ne puissions donner à personne délégation pour penser pour nous ; délégation pour chercher pour nous ; que nous ne puissions désormais accepter que qui que ce soit, fût-ce le meilleur de nos amis, se porte fort pour nous ». Cum’è ellu, i Scuzzesi dumandanu « u dirittu à l’iniziativa ». Sò quistione vechje, ma ùn sò micca vechje lune. Sò Lumi. Podassi ch’ellu ci hè in l’ortu di sta dumanda, duie granelle lampate da James Boswell quandu ellu hè vultatu da u so viaghju in Corsica vicinu à Pasquale Paoli.
U Ribombu Internaziunale : François Hollande hà parlatu d’eguisimu. Serà veramente cusì ?
Sébastien Quenot : Dipoi trenta anni, Londra abbanduneghja tutte e so respunsabilità à un liberalisimu sregulatu. U SNP difende un mudellu di sucetà affundatu da i cunservatisti è da i travaglisti dinù, sopratuttu dipoi Thatcher. I primi anu abbandunatu e so idee à u putere di u soldu. L’altri anu abbandunatu e so idee per i soldi di u putere. E pruposte di Ukip in Inghilterra o di Le Pen in Francia, rispondenu à stu sintimu, à stu disincantu, à e paure è à a miseria. Invece, u SNP è i so partinarii sò stati capaci à fà sente à una bella parte di l’upinione ch’ellu c’era una altra strada trà abbandonu à i soldi è abbandonu di sè stessu à i sintimi i più vili. Anu datu una speranza, cù una strada à piglià senza purtà a pupulazione di fole in canzone nè in utupie vane nè in u focu di e paure.
U Ribombu Internaziunale : L’andatura si u SNP si pò definisce cum’è un’indipendentisimu di manca ?
Sébastien Quenot : Ùn sò micca s’ellu hè di manca. Hè suciale è eurupeistu, quessa sì ma senza esse paternalistu. In stu sensu, i Scuzzesi sò in avanzu nant’à l’andatura di i Corsi. Nun solu per u so ragiunamentu nant’à un identità aperta assai nant’à u vulè campà inseme. Ma dinù perchè sò stati capaci à difende l’idea chì a difesa di i diritti suciali è u sviluppu ecunomicu passavanu più da l’impegnu di i Scuzzesi è u putere d’Edinburgu chè da e scelte di Londra. In Corsica, sò sempre i partiti tradiziunali à incarnà l’accessu à l’impiegu, micca l’indipendentisti. Malgratu a scunfitta eletturale, ghjè una vittora pulitica è psiculogica. Finu à 55 anni, u « Yes » era magiuritariu in a pupulazione. Vole si dì chì i giovani credenu più in Edinburgu chè in Londra.
U Ribombu Internaziunale : Serà a storia cuntempuranea à cambià a psiculugia di i populi è dunque e so scelte pulitiche ?
Sébastien Quenot : A Catalogna hà patutu di u franchisimu. Oramai cù un pocu di cinisimu, si pò dì chì stu periudu ne face a so forza, a so leghjittimità dinù. Sò i Catalani inseme cù i Baschi à avè difesu a demucrazia è a so lingua di pettu à a dittatura assuciata à u naziunalisimu spagnolu. U catalanisimu, vechju sintimu puliticu hà vintu a so leghjittimità in a suffrenza. Dipoi u statutu di a Catalogna di u 2006, e lege catalane sò attaccate in e corte da u partitu pupulare o da famiglie minuritarie. Si pone dunque una quistione di demucrazia. Or ind’è elli, a difesa di u fattu demucraticu ghjè parte di l’ADN puliticu di l’indipendentisti.
U Ribombu Internaziunale : Tandu in Corsica è in Scozzia, diciariate chì demucrazia ùn ci n’hè ?
Sébastien Quenot : A demucrazia ghjè un ideale ch’omu ùn pò riduce à e stonde d’elezzione. A dice u Canadianu Will Kymlicka, in tutti i paesi a demucrazia passa nun solu per l’infurmazione, u ragiunamentu, a libertà di spressione è d’assuciazione ma dinù per a cunniscenza di e so radiche, di e so appartinanze, per a prumuzione di a cultura puntu è taccu dinù. Per u restu, in Corsica cum’è in Scozzia, mi pare esse una storia di culunialisimu cù forme di duminazione sfarente secondu l’epiche. Si sente bè in i discorsi di svalurisazione di sè stessu, di vergogna, ogni tantu ancu d’odiu di sè stessu. Nanzu, cridiamu chì u solu spannamentu pussibile passava per l’esiliu. Avà l’affari sò cambiati. Per u più, i giovani cercanu à stà cun duie tendenze. I primi si cercanu arrangiamenti è scruccunerie più o menu chjuche. A Scola è u travagliu, valori forti di a Corsica d’eri, li facenu ride. Sanu chì u diploma ghjè una prutezzione ma micca una guaranzia. Hè magia per elli di vede pezzi di terra trasfurmati in 4×4 o in vestiti di fama. Sò quelli chì ci vole à aiutà, à furmà u più. Accantu à què, mi si pare ch’ellu ci hè quantunque di più iniziative, di più diplumati ch’anu una visione rinnuvata di u mondu è di a Corsica. Ci hè l’Università è d’altre stituzione oramai pronte à accumpagnà a so furmazione è i so prugetti. N’aghju prufittatu ancu eiu cun quelli di a mo generazione. L’idea ch’o mi facciu di l’indipendenza di a Corsica passa forse più per stu raportu di forza internu trà ste duie vie chè cù Parigi.
Produit CORSU E RIBELLU
