S’hè parlatu assai di l’autostrade sta settimana, ma Segolène ùn hè stata a sola à viaghjà à contr’à sensu. Si dice chì ci hè sempre un’anima chì ùn seguita à l’altre è chì và contr’à u ventu. In Corsica avemu a nostra. S’hè lanciata pocu fà una squadra d’anziani cumbattanti cù u Muvimentu di a Corsica francese. Chì ùn a sapiamu mancu, ma a Corsica serebbe indipendente.
À dilla franca, nant’à l’autostrada di u populu corsu questi quì ùn risicheghjanu d’esse flasciati per eccessu di pertinenza. Eppuru si sò quantunque astradati per e territuriale. Bunissima per a demucrazia. Chì tandu ognunu ne ghjudicherà l’andatura. In quantu à u prugramma, pocu affare, fora di a pulitica di u nò. Si sente solu u rimore, a vuciata di un’ira à grugnulà è chì sumineghja u dubbitu.
Mentre chì a Corsica hè sempre à undighjà trà un regiunalisimu discitatu è una Republica addurmintata, si facenu i prumutori di un’identità zitta, annigata in u centralisimu. È ancu più giacubbini chè u Statu. Babbò face a so resistenza, dicia quellu…
À l’addisperu
Si dice chì quand’ella si spinghje a fiara si tira un saltu à l’ultimu. È quì i resistenti campanu l’ultima stonda di pettu à u marosu chì i s’annega. Chì sti pochi tempi l’abitanti di st’isula si campanu à ghjucà à esse un populu. A Corsica vole crede ch’ella si tene sempre un’anima. Ritene u so soffiu, circhendu forse una prumessa d’avvene.
Produit CORSU E RIBELLU
