Sò d’una memoria chì parechji anu sminticatu. Forse era cusì tracciata a so sorte. Una Corsica sempre à undighjà trà regiunalisimu discitatu è una quinta Republica stracciata in ogni locu.
Eppuru si spinghje u so ultimu sognu. Oghje si sveglia in a fasa terminale di a so assimilazione. Sanu chì a so lingua era, volenu crede ch’ella serà. Chì a so terra hà da firmà soia dopu à esse stata scumpartuta.
Si dice chì quand’ella hè sfracellata l’identità si tira un saltu à l’ultima. Dicenu ancu chì a ciatta, toccu a sera, corre à u lume è ci si cunsuma. Oghje a Corsica hè urfanella di u so passatu. È si cumpiace omu à crede ch’ella camperà u so avvene. Eppuru ùn simu ancu à salvà u prisente.
L’istatina chì si compie hà fattu vede chì quì tuttu pudia esse mandatu in ruvina. Chì serebbe ora di riflette à un avvene à long’andà. Per a Corsica. St’isula di rena induve tuttu ci pare d’esse più dilicatu chè in altrò. Induve u stantaghjolu s’impuverisce di più ogni ghjornu. Induve u puliticu ùn impenserisce di più ogni ghjornu.
Certi eranu ancu à scialà si la à l’Aviation club de France nanzu d’esse chjappi. In u frattempu, a maiò parte di i Corsi fermanu à caternu, annigati in u marosu di a crisa. Urfanelli di un’indiatura. Quattr’anni oramai chì si face assai rimore ma chì ùn si trova l’armunia.
Produit CORSU E RIBELLU
