Ghjè l’essenza di a mossa naziunale : fattu storicu, dirittu supranu, l’accessione di u populu corsu à l’indipendenza naziunale hè u sensu prufondu di tanti anni di lotta cuntempuranea.
Perchè a rivindicazione indipendentista ind’è l’eserciziu di u dirittu à l’autodeterminazione hè a sola uzzione pulitica chì rimette in causa a duminazione francese in Corsica, ghjè dinù quella chì ghjè cumbattuta cù i mezi i più feroci.
Per assicurà a so prisenza in Corsica, hè tuccata à u statu francese à fà integrà da u populu corsu l’impussibilità, è ancu u periculu, d’una Corsica indipendente. L’integrazione tutale ghjè fiascata. A ci dice a permanenza di a rivindicazione naziunale à u longu di i seculi, quale sia a manera. Ma puru, u discorsu di u duminante, di natura culuniale, hà lacatu e so traccie ind’u spiritu corsu. U sindromu di a castagna pone à i difensori di l’idea d’indipendenza a so sintenza, interrugativa : « Ah, site per l’indipendenza ? È ch’amu da manghjà ghjunti à l’Indipendenza ? E castagne ? ». Quella di e castagne ghjè firmata per pruverbiu. Ma traduce di più a paura di una cosa prisintata cum’è un’aventura scimesca chè u ricusu pupulare di a scelta di l’emancipazione.
À noi astri indipendentisti, stu fattu ci cummanda di fà opara di rispunsabbilità. Tinendu contu d’una parte di l’attaccamentu simbolicu di e volte miticu, ma veru, di i Corsi à l’idee d’indipendenza è di libertà è d’altra parte di i dubbiti ch’ellu sprima u dettu pupulare, Corsica Libera hà sceltu di purtà una cuntribuzione decisiva à u dibattitu.
A nostra Ghjunta di u mese di maghju avia arristatu u principiu di un seminariu da fà avanzà u prugettu indipendentistu. Di ghjugnu scorsu, si sò aduniti in Corti decine di militanti per una ghjurnata di travagliu prulifica assai. Ne hè isciutu u lanciamentu di I Quaterni di l’Indipendenza, prugettu evulutivu chì si prupone di purtà risposte pricise nantu à a nostra visione di a suvranità corsa. Eccune u primu quaternu. U so fine ? Torce u collu à dece idee sbagliate nantu à l’Indipendenza : ecunumia, conti publichi, demucrazia, ghjustizia, insignamentu, Auropa ecc. Tanti esempii chì facenu risorge di stu travagliu una dimustrazione semplice :
A dipendenza ci tomba, ghjè ora di custruì una strada corsa per l’Indipendenza !
Petru Antone TOMASI
Produit CORSU E RIBELLU
