A dilla franca, votre chronique en langue #corse

Retrouvez comme chaque dimanche « A dilla franca » votre chronique en langue corse

Periculi

Bon và bè, hè a rientrata, a sapemu. Dopu à dui mesi sdraiati à u sole – quand’ellu spuntava – ognunu hè in depressione à u ritruvà di i chjassi di l’invernu. È à dilla franca, vistu cum’ellu si prisenta, si capisce.

À u guvernu, unepochi anu fattu a so rientrata surtendu. A famosa ‘cuvée du redressement’ a s’anu ingullita sana sana nanzu di rende nant’à u presidente. Tandu Manuel – chì a sapemu ùn hè micca un Ayrault – ùn pudia tullerà u minimu affare chì pudia impiastrà a so autorità. È cum’è di solitu, l’indiatura pulitica di u guvernu hè cambiata.

Si sà chì si pò esse di manca è tene caru l’imprese, ma cù un discorsu simile ci hè da dumandà si s’è Manuel ùn hè passatu da u PS à l’UMP durante u mercato. Si parla di a fine di e 35 ore, di rifurmà u codice di u travagliu, ma si scorda omu chì à mumenti più nimu travaglia. È si pò pensà chì ùn si pò più fà oghje una pulitica di manca, quella di u core, cù 0% di crescita.

Chì ciò chì cresce oghje sò e vendite di u libru di Trierweiler, Merci pour ce moment. Ancu s’è François, ellu, ùn l’hà da ringrazià. Si sà chì e parolle di l’amanti sò cum’è e stagione… si prisenta bellu tempu, dopu sò timpeste è toni.

È tirà avanti…

A timpesta hà da esse dinù per u guvernu chì hà annunziatu pocu fà ch’elli ùn si teneranu l’ughjettivi bugettarii quist’annu. Ancu l’UMP, chì di solitu hè sempre accanita appressu à u putere, ùn lu vulerà mancu s’ella hè in testa in casu di dissuluzione. Hè cusì quand’omu si primureghja di più di a so carriera pulitica chè di l’avvene cullettivu. In quantu à u FN, dice ch’ellu seria prontu à assume u putere, ma vistu chì bilanciu ùn ne anu, l’affari sò più faciuli.

Intantu, ciò ch’ùn pare mancu appena faciule, hè di risparmià l’isula di pettu à a famosa batteria Xylella Fastidiosa chì, senza ghjochi di parolle, ci hà da dà fastidiu, pisendu ci in capu cum’è a spada di Damoclès, minacciendu l’ambiu è u mondu agriculu. Eppuru i puteri publichi fastidiu ùn si ne danu, malgradu e chjame lampate. Ùn basteranu e sperienze di u cynips è a frebba catarale per fà in modu ch’ellu stia fora?

Fora. Cum’è i sculari chì anu aspettatu davant’à e porte di e scole in cuntinente. Certe sò state chjose da pulitichi chì anu fattu vede a so capacità imaginativa per oppone si à a riforma di i ritimi. Ma al di là di i bisbiglii pulitichi si scorda omu di e missione di l’istituzione per l’avvene.

Eccu, ci simu, hè a rientrata è ci hà da tuccà à tirà avanti. Chì per avà u solu affare chì avanza in Francia, hè u disimpiegu.

(…) 

CorsicaInfurmazione.org by @Lazezu 

Revue de Presse et suite de l’article  : 

CORSE MATIN

Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]