Torna u dolu. Dopu à una ghjurnata di festa, dumenica scorsu in Purtivechju, a sciagura volta nant’à e famiglie corse. Finitu qualchì ghjornu prima, u tettu d’una pagliotta si n’hè sprunfundatu. In una stonda, fili di vita sò stati tagliati à l’ispensata. 
Cum’è vistica di a catastroffa, un ritrattu sprupusitatu. Quellu di i quattru chjodi chì tenianu a struttura di legnu. Subbitu in e mente, un ricordu neru.
« Hè Furiani ! », anu mughjatu certi. Eccu a catastroffa di u 5 di maghju di u 92, in e mente una volta di più. 18 morti, più di 2000 feriti. U dolu di Furiani ùn hè mai statu fattu. Dolu cumunu è senza fine. Quelli chì c’eranu, quelli ch’ùn c’eranu, ognunu s’arricorda, ognunu sà ciò chì ci hè statu. È quantu u drama era scrittu da mani incuscente. Ci sò sciagure da petrificà un populu sanu.
Qualchì ghjornu prima à u vintiduiesimu anniversariu, u scempiu di Purtivechju hà fattu ballà u fantasimu di Furiani. Scheletru di legnu o di farru, spunta sempre u viotu ghjuridicu ind’è u quale ci truvemu.
Certi drami ponu sempre esse impediti. Dui o trè siconde ponu salvà. Bona nutizia di a settimana d’altronde, a Corsica tenerà i so dui Dragons di a securità civile. Una lettera sola. Hè stata data a risposta à a dumanda fatta da i deputati corsi. Puderanu esse salvate, quelle persone in periculu, da a piaghja à a muntagna.
Quellu drama di Furiani ferma un disertu ch’ ùn si pò capisce. Davant’à issa muntagna di farru, di sangue taccata, ma dinù, davant’à u silenziu di u Statu. Sta settimana, u cunsigliu municipale di Bastia hà vutatu una muzione per rende issu ghjornu sacratu in Francia, senza partita di ballò. Ferma à cunnosce a risposta di u Statu, chì i voti di quì ùn facenu sempre quelli di quallà. 44000 persone anu firmatu a petizione dedicata à issa calamità, a più maiò di a storia spurtiva francese.
Si dumanda un ghjornu solu.
1440 minuti di silenziu per u dolu d’un isula sana.
22 anni dopu, ci vole sempre à dassi di rimenu per fà rispittà u silenziu.
Najat Vallaud-Belkacem hà ancu apertu u so scagnu per riceve a delegazione, furmata per u rispettu di issa vulintà cumuna. Dopu à l’ascoltu di a ministra, fermanu numarosi quelli da cunvince.
U drama di furiani pare un dolu eternu ch’ùn trova silenziu per pregà.
Ci sò sepulture chì devenu luttà per un suppulu di pietà.
Furiani ferma un dolu ch’ùn hè ancu à compie.
DIANA SALICETTI pour Corsematin.com
D’autres photos de cette mobilisation sur ce lien
(…)
CorsicaInfurmazione.org by @Lazezu
Revue de Presse et suite de l’article :
Corse MatinCorsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]
Produit CORSU E RIBELLU
