Assemblea di Corsica, Quistione à bocca di Saveriu Luciani, à nome di u gruppu Femu A Corsica :
O Sgiò Presidente,
Dipoi u principiu di a mandatura, si pò pensà senza dubbiu ch’ella si hè inceppata quì una vuluntà forte di cambià à cortu andà, di manera fundamentale, u statutu di a Lingua Corsa, da fanne perfine una lingua ufficiale. S’ellu si face casu à tutti i sundasgi publicati in stu duminiu, s’accorge omu chì sta pratesa legitima hè sustenuta di manera più chè larga da a sucetà isulana. Ma fattu si stà chì da u dì à u fà, u travagliu ci hè sempre. Lascendu da cantu l’aspettu custituziunale, parleremu stamane di l’azzione specifica ch’ella pò purtà l’Assemblea di Corsica à livellu di u sviluppu di a pratica cusì detta di « l’immersione » è, in particulare, di i centri di sughjornu lingusiticu di Bastelica è di Savaghju.
Ancu s’è a nostra Cullettività ùn hà a cumpetenza nant’à l’andatura educativa di stu paese, U PRDF 2007-2013 hè venutu à rinfurzà l’idea di sviluppà i centri d’immersione in Lingua Corsa, dumandendu ancu a creazione di strutture simule in Corsica Suttana. Un passu in daretu per turnà à ripete ch’ellu ci ferma un sforzu maestru à fà per arradicà e filiere bislingue in u secundariu – l’avemu dumandata ùn sò quantu volte quì – da dà una cuerenza à u dispusitivu di l’insignamentu di u Corsu. Allora, s’è n’aspettemu sempre a creazione d’un Cunsigliu Accademicu previstu à posta, ci pare per oghje impurtante d’ammentà a situazione propiu dilicata di e strutture pedagogiche chì venenu in appoghju.
Attaccheremu prima cù u cartulare di Bastelica : centru creatu per deliberazione di l’Assemblea u 14 di Dicembre di u 2009 – 4 anni fà – cù a pussibilità di ghjuvacci di l’anzianu gruppu sculare di u paese, prupietà di a cumuna, per una piggiò di 20.000 euri à l’annu, travaglii di rinnuvazione per 1,2 milione d’euri, quessa da pudè accoglie una settantina di sculari nant’à guasi 1000 metri quatrati, cù, in lu frattempu, di ferraghju di u 2012, l’attribuzione di a Delegazione di Serviziu Publicu per 3 anni à l’associu PEP 2B chì gestisce digià u centru di Savaghju.
À chì ne simu ? A v’aghju da dì : oghje chì ghjè oghje, aspettemu sempre a so apertura. L’affare ci pare bellu in ritardu, ancu s’è ùn feremu tantu casu à ciò ch’ellu scrivia di ghjugnu di u 2010 u Retturatu nant’à u so situ – Retturatu chì stacca unepochi di prufessori certificati di Corsu per l’occasione – chì l’apertura era annunziata per ghjennaghju di u 2011. Eccu per Bastelica.
Inquant’à u centru di Savaghju, nant’à a cumuna di Vivariu, pruprietà di l’associu delegatariu, centru creatu 30 anni fà è apertu à a pratica immersiva dipoi 15 anni, parleremu di i penseri di u Presidente di st’associu delegatariu. In una lettera mandata à i vostri servizii di lugliu scorsu, mentuvava à a bella megliu i capatoghji per u più quelli di funziunamentu di a struttura. À l’accorta parlava di a necesità di rinnuvà i bastimenti, minacciati di chjuditura – ci sò raporti di l’APAVE è di a cummissione di securità dipartimentale – s’ellu ùn ci era un prugramma di travaglii, ch’ellu sia à livellu di l’alarme incendii è di tutta a stallazione elettrica in un primu tempu, è po dopu di u sviluppu di l’accolta, riguardu à l’evuluzione è u sviluppu di i sughjorni linguistichi. Dumandendu à scuntravvi, u Presidente di a PEP 2b presentava un cartulare d’un cantieru di 300.000 euri.
In corte parolle, in tempu di rivindicazione di cuufficialità, a nostra Cullettività hà una rispunsabilità tremenda in stu duminiu è li tocca, à parè nostru, à sustene l’attività di i centri, siasi per accelerà l’apertura di Bastelica, siasi per rinnuvà a struttura di Savaghju. L’averete capita, ùn andendu più in là, di pettu à l’impegnu forte di st’Assemblea in u sviluppu di a Lingua Corsa, ch’ellu ùn hè più ora di tricà. Quand’omu parla di e filiere bislingue, sapendu ch’è no simu in ritardu nant’à e tappe di u PRDF, ci tocca à risponde è à sustene subitu avà st’arnesi chì sò di primura in a dimarchja generale di Riacquistu ver di una sucetà bislingua.
Vi dumandemu dunque di dicci ciò ch’è vo cuntate di fà per sti centri d’immersione, centri à prò di tutte ste leve di sculari indiati in l’amparera di u Corsu è puntelli di u spannamentu di l’educazione bislingua.
(…)
CorsicaInfurmazione.org by @Lazezu
Revue de Presse et suite de l’article :
sur Corse Matin, sur Alta Frequenza, sur RCFM, Sur Corsica, Sur le Journal de la Corse, Sur Alcudina, sur Corsica Infurmazione/Unità Naziunale, sur France 3 Corse, Sur Corse Net Info (CNI)
Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]
Produit CORSU E RIBELLU
