S’ellu ùn ci hè cà un elementu di primura in l’identitai corsa, avaria da essa a sulidaritai trà Corsi I dui tarri più viulenti in tuttu u tarritoriu francesi sarianu sicondu i cifri Marseglia è a Corsica.
Ma in Corsica si rimarca à spessu chì i sforzi di u Statu ùn sò mancu à pena listessi in i dui lochi : cintunari di pulizzeri in più mandati da Manuel Valls in Marseglia ogni sittimana, mancanza di ghjudici, dinunciata da i sindicati di i magistrati, chì forsa si pinsarà un ghjornu à numinà ni unu di più in Corsica sicondu Christiane Taubira. Ma si pò ancu capiscia issa sparitai. Sò cummissi i viulenzi di Marseglia da gruppi chì, puri s’elli ni collanu à un livellu criminali trimendu, sò prima di tuttu ghjovani chì compranu è vendinu a droga.
Li raporta assai issu traficu, è cercanu di pruteghja u so tarritoriu o d’acquistà ni unu, un tarritoriu chjucu, un carrughju o calchì palazzu di i quartieri Nordu. Tandu s’elli ci passanu più spessu i vitturi di pulizza, hà da essa dighjà unu inciampu maiò pà u so cumerciu è ancu pà i lotti trà elli. In Corsica inveci, si tratta pà u più di banditisimu mafiosu d’altu livellu, è micca d’insicuritai ginirali. Tandu si pudarianu multiplicà i pattrugli, ancu ogni deci minuti, si saparianu adattà l’assassini à u so ritimu, è fà i fatti soii subitu quand’ella hè passata a pulizza. Ma s’ellu hè più palesu ben sicuru issu banditisimu « altu », ùn voli dì ch’elli ùn creschinu dinò in l’isula i picculi viulenzi chì toccanu di più a vita cuttidiana d’ugnunu. Calchì asempiu ? Guasi tutti i ghjorni, un omu mascaratu entri cù un cultellu in i magazeni di Bastia par furà, à quandu ci riesci, à quandu fiasca. Ghjovani mascarati ma garbati assaltanu in casa soia una ghjurnalista in a Bastricaccia, si volinu fà apra un cascioni chì ùn ci hè, è si ni vanu cù calchì euro è dui buttigli di vinu. Si trova chjosu da un arristatu prifitturali un caffè aiaccinu duv’ella hà racoltu a pulizza parechji dosi di droga, lampati in tarra quand’ella ghjugnia. È tira avanti è tocca.
La presse en parle / Suite et source de l’article
Vos Réactions, vos commentaires sur Ce forum ?
Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale] Vous aimez cet article ? Faîtes-en profiter vos amis !
Produit CORSU E RIBELLU
