(Unità Naziunale – 5 mars 2018 – publié à 10h30) L’entre marzu hà resu tristu L’Oretu è l’isula sana. Si n’hè andatu Ghjuvanteramu Rocchi. A Corsica di e lotte pienghje un gran’ pueta, u militente culturale, quellu puntellu maiò di a leva di u Settanta.
Arricurdemuci di u Maestru ch’ellu fù à prò di l’insignamentu di a lingua corsa.
Arricurdemuci dinò di a fede tamanta è di l’energia miraculosa di l’omu indiatu, da l’alba di u Riacquistu sin’à i tempi di l’oghje.
Guasi cinquant’anni d’indiatura, di scrittura è d’impegnu pè dà un avvene à a lingua in scola, da fanne propiu una lingua viva in bocca à i zitelli d’un Populu in mossa. 
Di stu tercanu, e puesie, e canzone, e filastrocche è l’estru empieranu per u sempre u tempu à vene è a nostra storia à custruì.
Senti U muvrinu, simu sbanditi, a fiaccula di a vita, Golu, i mei, è tant altre meraviglie ; senti sti canti ch’ùn volenu tace è facenu cantà tutti i figlioli di Cirnu. Chì u pueta ch’è tù sì ùn pò mai more, o Ghjuvantè.
À tè oghje l’umagiu è u salutu di l’omi è di e donne di sta terra.
Vai, pueta, è ch’elli ti sianu cuncessi a pace è u riposu in l’altu celu di Casinca.
À tè a Corsica Regina, à ella tù.
PARTITU DI A NAZIONE CORSA
Produit CORSU E RIBELLU
