(Corsicainfurmazione.org – Publié le 18 mars 2025) Si n’hè andatu à l’eternu Pierre Alessandri.
Voici les réactions des principaux mouvements, des autonomistes aux indépendantistes, ainsi que des syndicats, et personnalités de Corse.
U Partitu di a Nazione Corsa : Erisera a Corsica hà persu un’antru figliolu. Pierre Alessandri, l’agricultore, u figliolu, u babbu di famiglia, u militente sindicale, u naziunalistu indiatu è l’amicu hè statu assassinatu. Erisera un’antra disgrazia, dopu à tant’altre strage, hà culpitu un’isula sana. Stamane u murtoriu chì sona trinneca ogni cuscenza, di pettu à a malamorte chì ferisce l’anima d’un paese è l’essezza d’un populu. Oramai ùn bastanu e parolle, nè mancu tutti sti discorsi. Pensendu forte à i soi è à u so dulore prufondu, spartimu a so pena tamanta, è li purghjimu affettu è sustegnu. Addiu o Pé, i militenti di u PNC propiu cummossi salutanu a to memoria. Ch’è tù possa truvà in sta terra ch’è tù tenia cusì caru u riposu eternu. À tè a Corsica regina.
Core in Fronte · Hè statu tombu, à tradimentu, u nostru amicu Pierre Alessandri, eri sera in Sarrula è Carcupinu. Torna una volta, a Corsica cunosce l’affanu cù sta disgrazia è l’agricultura corsa pienghje un omu unestu è curagiosu. Pierre era un rispunsevule agriculu cù u sindicatu Via Campagnola, impegnatu, dipoi 30 anni, pè un’agricultura viva à prò di u populu corsu. S’occupava di a splutazione d’arranci di a so famiglia è facia una pruduzzione d’oliu essenziale in a so distilleria di U Mandriolu. Patriottu corsu, militente naziunalistu sinceru, Pierre Alessandri era un anzianu studiente à l’Università di Corti. Ghjuntu in u 1989 à a facultà di biulugia, militava à a CSC nanz’à esse unu di i fundadori di Ghjuventù Paolina in u 1992. Membru di U Rinnovu in u 1998, era candidatu à l’elezzione territuriale di u 2004. Vice prisidente di a Camara d’agricultura di u Pumonte, era statu, dinò, candidatu à a so prisidenza in u 2019. Era un puntellu di a difesa di terre agricule, sempre oppostu à a speculazione è u spussessu. A Corsica more di e so strage è di quelli chì cercanu à lampà la in lu foscu. Core in Fronte face e so parte di dolu à a so moglia, à a so figliola è à l’inseme di a so famiglia. Ci tenimu à fiancu à i soii.
Partitu Femu a Corsica · Torna una volta, a Corsica s’hè svighjata sta mani addulurita, in l’affanu, a collera è u dulori tamanti. Pienghji oghji un figliolu soiu, Petru Alessandri, assassinatu nantu à u so locu di travagliu, ch’eddu avia annacquatu di u so sudori, di i so strazii, ma dinò di a so fedi è di i so spiranzi, à u Mandriolu in Sarrula è Carcupinu. Omu unestu, patriottu arradicatu à a so terra, travagliadori d’ogni ghjornu, militanti sinceri in u sindicalisimu studientinu è dopu agriculu, Petru Alessandri era un esempiu di travagliu, d’unestità è di tutti i valori ch’è no bramemu pà u nosciu Paesi è u nosciu Populu. À i so parenti, à a so moglia Talou, à a so figliola Anne-Camille è à tutti i soi, Femu a Corsica prisenta i so cunduglianzi afflitti.
Fà Populu Inseme · Una volta di più, a Corsica hè in dolu. Petru Alessandri, hè statu tombu arisera in Sarrula è Carcupinu. Omu unestu, agricultori è patriottu arradicatu à a so tarra, era un asempiu di travaddu è di valori. À i soii prisintemu i nosci parti afflitti. Ch’eddu riposi in paci..
Ghjuventù Paolina · Pocu parolle per ammintà ciò ch’hè torna accadutu eri sera in Sarrola-Carcopino. Pierre, membru fundatore di a Ghjuventù Paolina in u 92, era un omu drittu è sinceru chì hè sempre statu impegnatu in a difesa di l’agricultura corsa, anzituttu essendu un risponsevule in u sindicatu Via Campagnola. Ci dumandemu pè disgrazia, s’è pudemu cuntinuà à campà nù un’isula duve l’usi stumachevuli sò inchjustrati cusì prufondu in a nostra sucetà. Femu e nostre parte à a famiglia è tutti quelli chì tenenu caru à Pierre.
Ghjuventù Indipendentista ·Ghjè incù una tamanta pena è indignazione ch’è no amparemu l’assassiniu di Pierre Alessandri, agricultore pumontincu, stu 17 di marzu di u 2025 in Sarrola-Carcopino. Ammazzatu in u locu di Mandriolu, hè statu traspurtatu per via di e so ferite à l’uspidale di a Misericordia in Aiacciu. Da u 2019, Pierre Alessandri patia di pressions, un clima di minacce è d’intimidazione per i quali a ghjustizia francese avianu cunniscenza. St’assassinu ùn pò esse cunsideratu cum’è un fattu diversu, si scrive inde un cuntestu allarmante d’insecurezza è di tensioni lucali. Vulemu chì tutt’a luce sia fatta nant’à sta tragedia. Hè imperativu chì a ghjustizia è e forze di l’ordine piglinu e so rispunsabilità per identificà è perseguità l’autori di st’atti ignobili chì toccanu a Corsica sana dapoi digià troppu tempu. Mandemu e nostre cunduglianze e più sincere à a famiglia è à i so cari. U so campà è u so cumbattu à prò di a nostra terra ùn devenu esse scurdati.
Voce Naziunale · Sin’à quandu ? Una volta di più hè statu assassinatu un omu, un militante, un travagliadore. Sin’à quandu emu da campà in una Corsica sanguinosa minacciata da a logica di l’arme ? Sin’à quandu u nostru populu cunnoscerà ste disgrazie ? Sin’à quandu a ghjuventù corsa ùn puderà cresce senza a paura di u lindumane ? Oghje pienghjemu Pierre Alessandri, l’innamuratu di a so terra, unu di i so figlioli. U militante chì hà fattu di a so vita un cumbattu perch’è noi campemu in un paese liberu. Cunduglienze afflitte à a so famiglia è i so amichi. À tè l’abbracciu di sta terra.
Jean-Christophe Angelini, élu à l’Assemblée de Corse et Maire de Portivechju · Ùn ci hè più parolle, da pudè sprime a tristezza è u dulore chi ci toccanu oramai. Era Petru un’omu schiettu, impegnatu pè a so ghjente è a so terra. Ùn si pò nè spiegà nè capì tamanta strage. Ci tenimu oghje à fiancu à i soi. Cù tante cundugleanze afflite è u nostru sustegnu.
Jean-Baptiste Arena, Président de la Chambre d’Agriculture · À tè u travagliadore unestu, à tè u babbu di famiglia, à tè l’amicu di tante lotte cù quale avemu spartutu sperenze per l’avvene di sta tarra. Ti rendimu umagiu ; tù chì ti sì impegnatu incù noi tutti per una sucetà agro-pasturale fundata nant’à a sulidarità è u rispettu di a persona umana. A to strada, fatta di travagliu, cù à i t’arrancciaghji di u Mandriolu, di passione è d’integrità, lascia un solcu vivu in u nostru mondu rurale. À a to famiglia, à i to cari, mandemu e nostre parte afflitte è a nostra sulidarità sincera. A Corsica ùn pò accittà d’esse una sucetà malata, induve a paura è a viulenza piglianu à suprana nantu à di u dialogu è a ghjustizia. Hè tempu di riflette inseme, cù rispettu è determinazione, per chì u nostru paese ritrovi a strada di a pace è di a dignità. Mai ùn lasceremu passa e forze bughjose è tenebrose chì arruinanu l’avvene di i nostri figlioli.
Paul André Fluixa · O Pè …. Tante lotte e speme spartute E ghjuverà à qualcosa di ramintà che t’ ere un tippu bè ? Dirittu, onestu, un travagliadorone, un omu fattivu, un militente di a prima ora, un sindicalistu agriculu impegnatu, un omu curagiosu ligatu à a so terra, oppostu à a speculazione, un amicu fidatu, un babbu fieru di a so figliola, un figliolu attenziunatu…ghjuverà à qualcosa ? Maladetta sorte à Cursichella ! So accasciatu, adduluritu… Un stridu ch’un vole sorte, lacrime asciutte..un spaventu ! E mo pensate à Talou è Anne Camille, i to parenti.. Mà ghjuverà à qualcosa ? …u to surisu
Saveriu Luciani, élu à l’Assemblée de Corse · O Pè ciò chì t’accade … a morte ciò ch’ella ci face oghje ghjornu. O tamanta disgrazia nant’à sta terra di Corsica. Corcia famiglia è poveru paese. Una preghera per tè stamane.
Jean-Félix Acquaviva, élu à l’Assemblée de Corse · militante, sindicalistu,travagliadore onestu hè statu tombu.Una disgrazia di più.Tanti ricordi di lotte passate è di giuventù.Pinsemu forte à a so cumpagna,a so figliola,i so parenti è tutt’à a famiglia.Oghje simu torna afflitti è tristi. Ch’ellu ripos’in pace.
Jean-Charles ORSUCCI, Maire de Bunifaziu · J’avais milité à la CSC avec Pierre ALESSANDRI lorsque nous étions étudiants à Corte. C’était un homme de convictions et d’engagements, politiques et agricoles. Un Corse attaché à son île qui œuvrait pour son développement. Son assassinat m’attriste autant qu’il me révulse. Je présente à sa famille et à tous ses amis mes plus sincères condoléances.
Sindicatu Mossa Paisana · Una volta di più un omu, un babbu, un travagliatore … hè statu tombu. Un vulemu esse ghjudice oh altru specialistu di ciò ch’un si sà. Ma un omu chi travagliava à so terra hè statu tombu rientrendu in casa soia, dopu à sò ghjurnata. Chi vulemu purtà e lascià cumè visione e rispettu di a vita per e generazione a vene ? A traversu l’omu sindicalistu e militante. A MOSSA PAISANA e i sò militante prisentanu e sò parte afflite à a sò famiglia.
Paul-André Colombani Député de la Corse du Sud · Pierre Alessandri, agricultori unestu è ingagiatu, attacatu à a so terra, figura rispettata di u mondu sindicali è associativu, hè statu assassinatu arisera. E mo prime pinsate vanu à a famiglia è à i soi, culpiti da sta tragedia insuppurtevule. Li mandu tuttu mo sustegnu in sti mumenti di dulore è di pena. Per l’avvena di i nostri giovani è di a noscia terra, hè tempu di sciappà stu giritondu tumbatoghju.
Paulu Santu Parigi, Sénateur · Quantu tempu torna e mamme corse devenu pienghje un figliolu ? Quantu tempu torna i figlioli devenu pienghje un babbu, un fratellu, unu di i soi ? A Corsica è u so populu sò dannati da l’assassini è nunda i face piantà. L’onestu, u travagliatore, u paisanu quellu chì strazia hè cundannatu senza raggiò. Tù o Pè era di issa sterpa, di quelli chì ùn cedenu, chì luttanu, chì sanu u muscu è u valore di sta terra è u so tramandà. Riposa in a Santa Pace di a Vergine Maria . Amicu, à tutti i toi, e mo parte d’affettu è di core.
Poggioli Pierre · Dolu. L’horreur encore..tristezza! Pierre Alessandri, omu unestu, travagliadore, sindicalistu agriculu,tombu arrisera. E parole,i scriitti sò pocc’affare davant’a stu novu scumpietu.. In 2019, à sò distilleria era stata distrutta da incendiu..Duglianze afflitte à tutt’i soi.Risp
Paul-Felix Benedetti, élu à l’Assemblée de Corse · Pierre Alessandri era un travagliatori unestu è un omu sinceru. Hè statu tombu à tradimentu in u spinu. À u militenti è à l’amicu, mai ùn ci scurdaremi di tè.
Romain Colonna, élu à l’Assemblée de Corse · Sta mane, una volta di più, una volta di troppu, a Corsica pienghje unu di i so figlioli. Petru Alessandri, agricultore arradicatu, travagliadore di a nostra tarra, militante di u nostru paese, hè statu tombu. Prisintemu à tutta a so famiglia è à i soi e nostre cunduglienze afflitte. Ch’ellu riposi in Pace !
I Voci Di a Gravona · A terra Corsa hè stata torna intachata di sangue … d’un corsu … Un omu atore di u mondu agriculu chi cumpia a sò ghjurnata di travagliu. Un omu chi a pruvatu di difende à sò terra à traversu u sindicalismu. Un babbu, un maritu, un gravunincu. À Corsica à bisognu di campà serena per un avene lindu e schiettu per e generazione a vene. I membri d’I VOCI DI A GRAVONA prisentenu e sò parte à tutta à famiglia e a tutti i sò vicini. A muredda hè ghjunta a fina Chi lu sò prufumu porta u dolu Quandu vranu s’aviccina U mandriolu à persu un figliolu.
Lionel Mortini, Maire de Belgodère · “Ùn sì tombanu micca l’idee cù e balle.” Ma oghje, hè statu tombu un omu d’idee, un omu di bè, un travagliadore accanitu è un militante sinceru.Petru Alessandri purtava cun curagiu è cunvizione a voce di u mondu agriculu corsu, cun l’ideale chì a terra duvia firmà in manu à quelli chì a facenu campà. “Si ricunnosce u valore d’un omu à i so cumbatti.” Petru Allessandri si battia per l’agricultura, per u fundiariu, per a sulidarità trà agricultori, rifiutendu a rassignazione è l’inghjustizia.In tumbendu lu, hè un pezzu di u nostru cumbattu cumunu ch’elli anu vulsutu chjode.Ma u so ingaggiu ùn spariscerà micca cun ellu. Troppu crimini fermanu senza risposta.Troppu famiglie pienghjenu i so cari in u silenziu è u tralasciu. U Statu hà abbandunatu, a ghjustizia hà rinunciatu è a viulenza cuntinueghja à fà a so lege. St’andatura infernale deve piantassi.Hè ora chì a paura cambi di campu. Portu u mo sustegnu sinceru à a so famiglia, à i so cari è à i so cumpagni di lotta di u sindicatu Via Campagnola.Oghje, a Corsica perde un omu arrittu.
Camera Regiunale d‘ Agricultura · À tè u travagliadore unestu, à tè u babbu di famiglia, à tè l’amicu di tante lotte cù quale avemu spartutu sperenze per l’avvene di sta tarra. Ti rendimu umagiu ; tù chì ti sì impegnatu incù noi tutti per una sucetà agro-pasturale fundata nant’à a sulidarità è u rispettu di a persona umana. A to strada, fatta di travagliu, cù à i t’arrancciaghji di u Mandriolu, di passione è d’integrità, lascia un solcu vivu in u nostru mondu rurale. À a to famiglia, à i to cari, mandemu e nostre parte afflitte è a nostra sulidarità sincera. A Corsica ùn pò accittà d’esse una sucetà malata, induve a paura è a viulenza piglianu à suprana nantu à di u dialogu è a ghjustizia. Hè tempu di riflette inseme, cù rispettu è determinazione, per chì u nostru paese ritrovi a strada di a pace è di a dignità. Mai ùn lasceremu passa e forze bughjose è tenebrose chì arruinanu l’avvene di i nostri figlioli.
Produit CORSU E RIBELLU
