« Esiliu di i prufissori corsi basta ! » – #Corse

(Unità Naziunale – Lutte de masse – Publié le 8 mars 2024) Nazione voli riaghjiscia à l’articulu di u Corse Matin di u marcuri u 6 di Marzu rispettu à a sorti prufiziunali riservata à trè Capeziani di Corsica.

Trè ghjovani Corsi di più, trè ghjovani di troppu. Nazione cundanna cun firmezza a missa in baddu di u sistema aducativu francesu chì imponi à i nostri prufissori à pate l’esiliu in Francia à u principiu di a so carriera. À spessu, sò mandati in zoni aducativi particularamenti difficiuli (Créteil par undittu) postu chì u numaru di posti vacanti hè impurtanti. Sti novi prufissori cunnosceni a regula di stu cuncorsu naziunali francesu è di u so muvimentu chì li cunduceni à parta di u so paesi ancu s’eddi passani un’abbilitazioni in lingua corsa da pudè insignà i materii d’insignamentu in bislinguu mentra chì u sistema di punti è d’anzianità parmetti à francesi di sbarcà è stallà si in Corsica. L’oblicu hè di firmà parechji anni in Francia da pudè spirà di vultà in tarra soia. U tempu di i culunii hè sempri d’attualità. Tutti l’anni, adduniti, cundanni, articuli…. Si tullera ciò chì hè intullerevuli è si ricumencia l’annu siguenti. Sti pratichi sò innaccetevuli è miritani una rimessa in pratica. L’avvena di i nosci insignanti ùn pò micca essa ridottu è cundannatu in prima à i custretti amministrativi francesi. Nazione rivindicheghja una maestria di u sistema aducativu par via di un veru transferimenti di i cumpitenzi à l’Assemblea di Corsica par ottena a capacità di dicida è di metta in baddu una pulitica aducativa à prò di i ghjovani insignanti corsi chì t’ani a brama d’insignà in li so lochi. Ci voli à escia di manera difinitiva di a sfera nurmativa imposta da u statu francesu cù l’asempiu di l’aducazioni naziunali. Nazione dumanda à l’Assemblea di rivena à nantu à stu prublema ricurrenti è di truvà suluzioni in lu quadru di a suvranità naziunali. In urgenza, bisognu à ottena par u prossimu muvimentu di parsunali chì i Corsi esiliati possinu vultà in Corsica. Si tratta di dalli a priurità fendu valè u criteriu di u centru di l’intaressi matiriali è murali (CIMMM) cum’è rivindicatu dapoi tanti anni oramai. Nazione arreca u so sustegnu à sti trè insignanti è al di là à tutti i Corsi diplumati chì si voleni impignà par u populu corsu è chì sò bramosi di travaddà in tarra soia.

NAZIONE