(Unità Naziunale Publié le 24 octobre 2018 à 19h01) Voici la motion de Corsica Libera avec demande d’examen prioritaire qui sera proposée lors de la prochaine assemblée de Corse.
VISTU u decretu nu 2018-614 di u 16 di lugliu di u 2018 mudifichendu e dispusizione di u codice di l’educazione chì toccanu à l’insignamenti chì portanu à u bascigliè generale è à e furmazione tecnulogiche chì portanu à u bascigliè tecnulogicu,
VISTU l’arrestatu Nu 0162 di u 16 di lugliu di u 2018 chì tocca à l’urganizazione è à i vulumi urarii di l’insignamenti di u ciculu terminale di i licei, sanziunati da u bascigliè generale,
CUNSIDERENDU chì i liceani chì sò in seconda quist’annu seranu i primi à passà a versione nova di u bascigliè in u 2021,
CUNSIDERENDU chì sta riforma face sparisce e filiere Literarie (L), Scentifiche (S) è Ecunomiche è Suciale (ES),
commandez en ligne vos produits « Corsu è Ribellu » du siècle dernier
CUNSIDERENDU chì nanzu à a riforma, i liceani di a filiera literaria pudianu sceglie un insignamentu di spezialità di lingua corsa è cultura corsa cù un forte cuefficiente d’ottu,
CUNSIDERENDU chì ogni liceu generale deve prupone à sceglie à i liceani di prima di l’annu chì vene frà 7 spezialità nantu à e dodeci di previste da a riforma,
CUNSIDERENDU chì i licei sò in traccia d’adunisce i so cunsigli pedagogichi per sceglie e spezialità per l’annu chì vene nanzu di falle vutà à i cunsigli d’amministrazione à vene,
CUNSIDERENDU chì l’insignamentu di a lingua è di a cultura corsa ùn face micca parte di a lista di l’insignamenti di spezialità,
CUNSIDERENDU chì i puteri publichi sò ublicati di prupone un insignamentu di lingua è di cultura corsa fin’à a sesta oramai è ch’ellu deveria dunque esse prupostu dinù in spezialità à i liceani chì a volenu,
CUNSIDERENDU u gran’pianu di furmazione di l’insignanti di u primu gradu finanzatu per mità da a CDC è u Statu,
CUNSIDERENDU i bisogni impurtanti à vene di prufessori di e scole bislingui,
CUNSIDERENDU chì un insignamentu di spezialità lingua è cultura corsa seria una bona per appruntà i futuri candidati à i cuncorsi di l’insignamentu (prufessori di e scole bislingui, prufessori certificati o agregati abilitati…),
CUNSIDERENDU chì e risolze umane (prufessori certificati o agregati di lingua è cultura corsa) sò digià in postu è ch’elle davanu digià insignamenti di spezialità,
CUNSIDERENDU tandu ch’ella ùn cambieria nunda à livellu di l’urganizazione di i licei generali di Corsica è ch’ella ùn custeria nunda di più à e finanze publiche,
CUNSIDERENDU chì a dumanda d’amparera di a lingua è di a cultura corsa hè di più in più impurtante fora di a scola è dunque chì a sucetà corsa abbisogna di più in più furmatori cursofoni qualificati,
CUNSIDERENDU chì per l’Assemblea di Corsica, a lingua è a cultura corsa si devenu d’esse insignate à ogni livellu sculare,
CUNSIDERENDU i mezi finanziali è umani messi in opera ogni annu da l’Assemblea di Corsica per chì a lingua corsa si rinvivissi ch’ella fussi à a scola o in a sucetà,
CUNSIDERENDU chì mette a spezialità lingua è cultura corsa per u bascigliè currisponde à a vulintà magiuritaria di l’Assemblea di Corsica d’andà versu un bislinguisimu veru in ogni locu,
L’ASSEMBLEA DI CORSICA
DUMANDA chì a lingua corsa fussi pruposta cum’è insignamentu di spezialità in ogni liceu generale di l’isula in u dispusitivu novu di a riforma.
DUMANDA à u Ministru di l’Educazione è à u Ministru di l’Agricultura è di l’Alimentazione di mudificà in cunsequenza l’arrestatu Nu 0162 di u 16 di lugliu di u 2018 per integrà sta dispusizione.
Gruppu Corsica Libera
Produit CORSU E RIBELLU
