(Unità Naziunale – 6 janvier 2018 – 8h30) Ci saria piaciutu incu cori è di tradizioni di mandà i nosci auguri par l’annu chi sbucca ma i fochi chi hani minacciatu e hani arruvinatu i paesa e i pasciala com’è quiddi di Sant’Andria di u Cutone, di Chjatra é di Canale di Verde, di Monte, Linguizzeta di Cervioni è di Tagliu Isulacciu, di Pancheraccia é di Sorbu Ocugnanu, è tanti altri loca, ci porta naturalmenti à tistimunià prima di tuttu u nosciu sustegnu paisanu à tutti quiddi tocchi da issu addisperu è à porghjali a noscia sulidarità.
Hè a noscia natura chi parti in’ssi fiari maledetti. Hè u nosciu ambienti culturali, suciali è ecunomicu païsanu chi hè gravamenti attaccatu cusi. U focu participighja à issa pulitica chi ci ricusa a maestria tutali di ciò chi faci a noscia tarra.
U focu un hè una fatalità !
Hè a cunsiquenza d’issu mudellu dittu di svillupu, induva supranighja a scelta di u tuttu turisìmu, di a sola finanza, di u ceccu consumèrisimu, è di u spussessu nant’à quali s’accresci a spiculazioni immubiliaria, é a minurizzazioni di i corsi. Issu mudellu hè fattu da u sistema francesu.
Un altru mudellu hè pussibuli.
Hè quiddu par u quali dapoi anni è anni, dinò incù monda sacrifizii di a noscia risistenza, avemu luttatu.
Oghji chi ghjé oghji, à u mumentu induva ci ralligremu d’issa nova maghjurità patriottica chi si metti in ballu par via di a Nova Cullitività Unica, issi fochi criminali ghjunghjini par ramintàci l’opara maiori chi tocc’à ugnunu di noi : a maestria cumpleta di a noscia tarra.
Allora chi s’affaca una « Madame Corse » mandata da u guvernu francesu, femu valé tutt’insembu chi fora di niguziazioni purtendu nant’ à una suluzioni pulitica di sciuta di crisa, passi d’avvena un ci ni sarà…
Chjamemu tutti l’aghjenti di u nosciu rughjonu à purtà sustegnu à tutti quiddi tocchi da issi fochi maladetti. I chjamemu tutti à participà à custruiscia a Corsica chi no vulemu . I chjamemu tutti à mubilizzasi par una vera soluzioni pulitica.
Mandemu i nosci auguri di paci e di saluta à tutti i corsi, particularmenti à quiddi chi hani persu monda, chi sò soli, senza tarra, casa o travaddu, e incarcirati o ricircati par u so ingaghjamentu patriotticu.
A l’alba d’issa nov’annata, tinimu à menti chi c’è un paesu da fà è una Nazioni da spannà.
U Riacquistu di Portivechju
Produit CORSU E RIBELLU
