OBJET : Strategia corsa d’ufficializazione di a lingua
Caru cunsigliere,
Ghjorni fà, eramu in Pariggi ind’u quadru di u cusì dettu « gruppu di travagliu nantu à a lingua è a cultura corsa ». C’avemu purtatu a nostra pulitica linguistica cù u statutu di cuufficialità per puntellu. È quessa, cù l’eletti di a Cullettività Territuriale di Corsica attuali o quelli di a mandatura scorsa, l’avemu detta inseme aldilà di l’appartinenza à i nostri gruppi pulitichi.
L’avemu fatta, micca perchè no cridiamu chì e ministre c’avianu da annunzià a riunione di u Cungressu per revisà a custituzione in stu sensu. L’avemu fatta perchè avemu a cunvizzione sicura chì solu un statutu ghjuridicu forte puderà, ind’u tempu, securizà a messa in anda di una pulitica linguistica chì dia i listessi diritti à tutti. L’avemu fatta dinù perchè simu stati eletti per quessa.
Aldilà di e quistione custituziunale c’era, di modu transitoriu, a piazza per avanzà. A risposta ? pocu è nulla. Ma puru ùn c’impedisce micca di fà, da per noi, è in casa nostra.
Vinarà u ghjornu chì u raportu di forza puliticu ci parmetterà di strappà un statutu di cuufficialità di pettu à Pariggi. Intantu, u periculu murtale esiste è c’impone d’ùn cundiziunà micca a nostra azzione à quessa.
Cunsideremu u statutu di u 2013 cum’è a legge nostra. Quella chì c’insegna u caminu per una strategia corsa d’ufficializazione.
Lighjendulu bè ci si pare chì parechje misure pudemu cumincià à appiecalle avà in fatti di furmazione di l’agenti di e nostre amministrazione, di visibbilità di a lingua ind’a sucetà, di prisenza ind’i media, di tupunimia, di nurmalizazione di l’usu, di cuuperazione forte trà a CTC, l’Università è l’industria di a lingua chì ci tocca à custruìsce.
Andemuci stuzzichendu i cunfini di a legalità attuale.
O sgiò cunsigliere, sapemu per seguità a vostra azzione chè vo spartite sta logica.
Oghje, ci piaciaria di sente, davanti à l’Assemblea di Corsica, u metudu di travagliu chè vo ci pudete prupone in stu sensu è di chì manera l’eletti di l’Assemblea ci pudarianu esse assuciati.
À ringraziavvi.
DUMANDA A BOCCA POSTA DA M. Petr’Antone TOMASI A Nome di u gruppu « CORSICA LIBERA »
Produit CORSU E RIBELLU
