A Francia vene d’esse indidata in un raportu di l’ONU. Puru, u Statu francese, cum’è tutti i Stati putenti di a pianetta, ùn mancherà micca di fà ghjucà u so pesu è a so pressione pulìtica à u senu di st’urganìsimu internaziunale…
Vale à dì quant’elle sò state ghjudicate grave sse derive ! Parigi si face indidà per via di a so manera di trattà a ghjente dapoi u cusì dettu «Statu d’urgenza » messu in ballu dopu à l’attentati di nuvembre scorsu. Hè u Cumitatu contr’à a tortura ch’hà fattu ssu raportu, resu u 13 di maghju scorsu in Genève. Si dinunzia e perchisizioni, a gattiva accolta di i migranti o e viulenze di a pulizza in Calais. E cunsequenze di u « Statu d’urgenza » mèttenu in perìculu a demucrazìa. Dice u Cumitatu, ch’ellu hè «impenseritu da l’infurmazioni nant’à l’usu abusivu di a forza da e forze di pulizza à rombu di perchisizioni, pruvuchendu muche psiculògiche nant’à e personi cuncernate ». Dumanda u Cumitatu à u Statu francese « chì l’inchieste sìanu bè cundutte, e sèguite date è e sanzioni contr’à i rispunsèvuli appiecate ».
Li dumanda dinù di prutege e so minurità, frà i quali i romi, i musulmani, i ghjudei, i migranti vìttime « d’una crèscita di viulenza è d’atti criminali, sopratuttu dapoi l’ùltime attache terruriste ». S’inchiètanu dinù l’esperti di l’ONU di a ripressione durante à e manifestazioni è dinùnzianu « l’usu abusivu di a forza da a pulizza è a gendarmerìa pruvuchendu ferite grave è ancu morti ». Si parla quì di a morte di u ghjòvanu Rémi Fraisse d’ottobre 2014. U raportu dinunzia torna u troppu pienu di e prigiò francese, empiute à 116% è di e cundizioni d’incarcerazione, per vìa di u nùmaru impurtante di i prigiuneri chì si danu a morte… Stumachente torna, u suspettu d’abusi sessuali di suldati francesi nant’à cinnini in u Centrafricu ; u raportu dumanda « un inchiesta cèlera è efficace da purtà i rispunsèvuli di pettu à a ghjustizia è sanziunali per ssi fatti gravi ». Di ghjennaghju scorsu digià, i specialisti di l’ONU s’èranu inzerghiti da e minaccie nant’à « e libertà fundimentale » in Francia. Sta volta si stònanu dinù di u mancu di lagnanze di e vìttime è di u nùmaru impurtante d’inchieste senza sèguite quand’elle ci sò.
U raportu hè statu fattu nanzu à l’incidenti di Reims è quelli di e manifestazioni contr’à a lege di u Travagliu … ma si pò pensà ch’ellu ci sarebbe assai cose da dì nant’à sti fatti dinù. U Cumitatu contr’à a tortura di l’ONU hè cumpostu d’esperti indipendenti. U so rolu hè di curà l’appiecazione di a Cunvenzione contr’à a tortura, i trattamenti crudeli, senza umanità o degradante. Sta Cunvenzione hè stata zifrata da a Francia in u 1986. Dapoi, ci hè un raportu tutti i quattr’anni. Ma s’ellu s’interessava à a Corsica l’ONU, di sicuru sarèbbenu ancu di più zeppi ssi raporti.
Produit CORSU E RIBELLU
