L’Osservatoriu di u Nucleariu dinunzia un novu scàndalu di l’indùstria nuclearia francese è u so capifila, Areva. L’Osservatoriu hè un associu chì lotta contr’à u nucleariu, hà decisu di purtà lagnanza à u Tribunale per falsu, usu di falsu è messa in perìculu di a vita umana.
U rimpròveru porta contr’à uni pochi d’errori chì minàccianu a securità di parechje centrale nuclearie. Un audit palesa « irregularità nu u cuntrollu di fabricazione di circa 400 pezzi prudutti dapoi u 1965, frà i quali una cinquantina sarèbbenu in serviziu nant’à u parcu elettronucleariu francese ». L’Osservatoriu palesa « un ubligazione particulare di securità ou di prudenza imposta da a lege ; a viulazione vulsuta di ss’ubligazione ; a messa in perìculu diretta di a ghjente ; l’esistenza d’un rìsicu sùbitu di morte o di ferita ».
Decine di pezzi malfatti sò cusì in serviziu in Francia, ma dinù for’di Francia. À tal’puntu ch’ellu ci volerebbe fà piantà in furia a marchja d’una centinaia di centrale nuclearie in u mondu. Ssu scàndalu hè un culpacciu di più pè u fiore di l’indùstria francese. E pèrdite d’Areva èranu di 4,9 milliardi d’auri in u 2014. A crisa hè gravìssima, è custringhje l’impresa à a suppressione di 6000 posti di travagliu, chì mette in perìculu dinù a putenta EDF. I prublemi anu principiatu cù Superphénix (prugettu di surgeneratore nucleariu piantatu in u 1996 è ch’ùn hà mai marchjatu), pò e difficultà di l’EPR (reattore cusì dettu di nova generazione, vera catastrofa finanziaria), quelle d’ITER (prugettu nant’à a fusione nuclearia chì vole ripruduce a marchja di u sole… chjìbba !), Cigéo (altru prugettu scemu per intarrà u mulizziu nucleariu)…
Sò cusì decine di milliardi d’auri chì sò stati spesi per nunda. U perìculu ch’ellu face corre ssu novu scàndalu di pezzi malfatti hè impeghjuritu da u fattu ch’ùn si pò fà cunfidenza à a cusì detta « espertisa francese ». A so bancarotta hè stata piatta da i guverni francesi accecati da u lobby atòmicu. Peghju : l’Agenzia di Sicurezza di u Nucleariu (ASN) ch’hè incaricata di a securità di a pupulazione… palesa quì sìa ch’ella hè fràcica è incumpetente, sìa ch’ella hè cumplice… In tutti i casi hè una vera catastrofa pè a Francia, prupietaria à 87% di l’impresa è chì loda à quale a vole sente a gloria di u so parcu nucleariu ! Altru mutivu di ssa bancarotta : u secretu.
A putenza di u lobby nucleariu face ch’ellu si permette tuttu senza mai esse attaccatu. L’impussibilità di cuntrullà i dirigenti è l’impresa hà fattu chì i sbaglii, e gattive scelte, e derive ùn si pudìanu vede o indirizzà sùbitu è si sò cusì impeghjurite, piattate è prutette da u « sicretu di Statu » chì cura l’indùstria nuclearia. Oghje, ssa « prutezzione » cuntinueghja. I grandi mèdia pàrlanu pocu è micca di ssu scàndalu maiò.
Hè quantunque incredìbule ! Avete intesu parlà voi, di st’affare ??…
Capite perch’è sò stumacata da u lobby nucleariu.
Produit CORSU E RIBELLU
