(PAROLES DE CORSE) À l’ora ch’o scrivu, ne simu sempre à l’orrore è à u dolu. Odore di sangue è di polvera. À u Bataclan, di ste note di musica, n’anu fattu una notte di morte. Una notte longa ch’ùn hè ancu à compie si. Stridi, lagni è pienti. Quale hè ch’ùn li pò sente ?
In Ankara contru à i Kurdi, in Parigi contru à i giovani, in Egittu contru à un aviò russiu è in Beyruth contru à i Sciitti, sempre sò civili à esse tocchi. Hè murtoriu chì sona per l’umanità. Finu à avà, u valore u più di primura per e demucrazie uccidentale hè statu u dirittu di u petroliu. Era quessa l’ipotesi ufficiale di sta diplumazia di l’oru neru : s’è un paese s’apre à u liberalisimu ecunomicu s’aprerà prestu à u liberalisimu sucetale. Fatt’è fine chì in sti paesi tenuti da famiglie è oligarchie preputente, cù i nostri soldi è u sustegnu internaziunale di e demucrazie, si sò cresciute l’uppusizione à l’ombra di l’islamisimu. Peghju, i nostri paesi ùn sò intervenuti à u Mediu uriente chè per difende i so interessi ecunomichi quandu elli eranu minacciati in Iraccu, à u Koweit o in Libia. Quandu elli si sò mossi i populi per liberà si, simu stati in casa, abbandunendu li in piena guerra civile.
In u cuntestu mundiale di crescita di l’inugualità, ste guerre danu un sensu à a vita è di e volte à a morte di tanti giovani. Per i primi, u so parcorsu sculare s’hè compiu cù una surtita di u sistema educativu senza nè diploma nè speranza d’inserzione suciale è prufessiunale. In u duminiu, a Francia ghjunghje in testa di l’inugualità d’educazione di tutti i paesi di l’Ocde. Or si sà chì l’inugualità sò spessu e radiche di u sintimu d’inghjustizia. Sò tandu e so frequentazione in carrughju, in prigiò o nant’à Internet chì anu purtatu i giovani versu l’islamisimu radicale. Per d’altri, quelli chì u so parcorsu sculare s’hè spessu sbucinatu in u duminiu di e tennulugie nove, e so cumpetenze è a so poca cultura di l’Islam è di e religione li anu apertu e porte d’una ricunniscenza suciale ch’elli ùn averianu forse micca trovu in Europa. Un studiu publicatu di nuvembre scorsu da France Stratégie palesa e currelazione forte trà u locu di campà è e pussibilità di mubilità suciale.
Produit CORSU E RIBELLU
