Sè vo circate à capisce ciò chì si passa in Tallone, Prunelli, Vicu, Vighjaneddu, Ghjuncaghju è in ogni locu induve a pupulazione dice u so stumacheghju…
sàppiate ch’ùn hè micca u lozzu ch’impuzzichisce l’aria, ma e pulìtiche aduprate sin’à avà ! Ùn si supporta più e rumènzule perch’è omu ci lampa tutti i lozzi à buleghju. È ghjè a robba fermentèvule – chì cuntene sin’à 80% d’acqua – è chì, mischiate cù a robba brutta è i mullizzi da tutte e mamme, puzza pruvuchendu gasi è suchju tòssichi.
Ùn sò sè vo vidite a tuntìa: oghje, si paca per sepellisce l’acqua !!! I Fermentèvuli raprisèntanu 30% di a massa di i nostri lozzi è 50% di u so pesu ! Sò soldi ghjittati in vera, un veru scumpientu !
Dapoi chì u mondu hè mondu, l’omu pruduce mullizzi, sarebbe ora d’amparà à trattali, nò ? In certi lochi hè fatta, è si parla ancu di « zeru frazu », ancu in e cità maiò cum’è Chicago, o i paesi cum’è l’Australìa, vale à dì ch’ellu hè pussìbule d’ùn ghjittà più nunda è di ricuperà tuttu per pruduce… ricchezza ! I nostri antichi a fecìanu senza impenserìscesi, i resti di cucina e si manghjàvanu e galline o i porchi… Ghjè u mondu mudernu ch’hà fabricatu l’imballasgi, u plàsticu, i cartoni è e scàtule da tutte e mamme ! Frà quessi, i lozzi periculosi cum’è a pittura, i sulventi, e pile eccètera, ponu esse trattati di manera specìfica in centri speciali. Dinù a carta, u vetru, u plàsticu, u ferru, i vestiti,… tuttu si pò ricuperà per turnà à fassi una vita nova ! È più si tratta in e filiere di recuperazione, è menu ci hè lozzu da mette sottu terra, è menu si paca, è più dùranu i centri di suttaramentu.
E cose avvànzanu un pucarellu in Francia. In Còrsica nò. 20% solu di i nostri lozzi sò spiccati… in Aiacciu, solu 6% ! U fiascu hè tremendu è ghjè a càusa di i capatoghji d’oghje. I rispunsèvuli sò quelli chì rimpròvanu à l’abitenti di u Pumonte, u Valincu, u Fium’Orbu o Aleria, u so mancu di sulidarità, allora ch’elli subbìscenu dapoi anni è anni l’egoìsimu di a Corsica sana, è pè u più quellu di i dui centri urbani !
U solu scopu di l’autorità, prefetti è eletti tradiziunali, hè statu sin’à avà di circà a facilità (l’incineratore prima, i centri di suttaramentu dopu) è di mette in stacca di « l’amichi » i soldi pùblichi sviluppendu un sistemu di trasportu à traversu a Corsica cumplettamente stùpidu d’un puntu di vista ecunòmicu. Oghje, ci vòlenu impone usine mecanobiològiche (detti TMB) per mantene in fatti ssu sistema di trasportu !!!
A suluzione, u mondu sanu a sà, hè di spiccà u lozzu induv’ellu hè creatu, vale à dì à u principiu : u citatinu ! Micca trasportu inùtile, micca TMB è ancu menu incineratore ch’impuzzichisce a salute ! U TMB di Tallone prevede di mette in terra 95% di a so « pruduzzione »… vale à dì u prublema fermerà sanu ! È vòlanu in più tuccà à a lege liturale per què !
« I lozzi ùn sò micca una fatalità, ma a gattiva gestione ne fàcenu una bomba pè e generazioni à vene » dice U Levante nant’à u so situ cù u cullettivu Zeru Frazu.
A sola suluzione chì vale hè a strattegìa Zeru Frazu. Efficace, pulita, menu cara, creatrice d’impiechi : spiccà i lozzi fermentèvule in cucina in casa vostra per fanne cumpostu, racoglie l’imballasgi spiccati à i purtoni, fatturà u serviziu in funzione di u sforzu fattu : « più si spicca, menu si paca » ! Mette sottuterra infine ciò chì ferma ch’ùn disturberà più a ghjente postu ch’ellu ùn puzza più è ch’ellu ci serà assai menu volume.
A vi dicu, in menu d’un annu, mondu capatoghji saranu regulati cusì !
Aiò o ghjente, un pocu di sumerinu !
Produit CORSU E RIBELLU
