A Manca manda u so sustegnu sinceru à e duie insignante di Prunelli di Fiumorbu chì anu vistu a so missione educativa spanticata da uni pochi di genitori razzisti chì anu circatu d’impedisce i figlioli di cantà in àrabu a canzona Imagine di Lennon privista pà una festa sculare.
U ricusu apartu di sti genitori simbulizeghja a liberazione di a parolla razzista in Corsica chì si sprima oghje più cà mai senza cumplessu ne vargogna.
Intarvene st’avvenimentu in un cuntestu di crescita tremenda di i partiti razzisti di strema dritta in Auropa, in Francia, ben sigura è ancu in u nostru paese sott’à a forma di micro urganisazione lucale piriculose di u puntu di vista di l’azzione cum’è di l’ideulugia.
Stu razzisimu hè a cunseguenza di a spantichera culturale ch’ella pate a Corsica dipoi anni è anni, spantichera resa cumpletta da a trafalera di I bugetti pubblichi messi à u sirviziu di a cultura.
Hè a nostra rispunsabilità cum’è urganisazione pulitica di dinuncià è cumbatte in ognilocu è di tutti i modi pussibuli tutte e forme di razzisimu è di sarratura à a diversità. Era dinò a rispunsabilità di l’amministrazione francese, vale à dì di l’ispezzione academica d’ùn lascià vince u razzisimu in iscola ; pruibisce a festa hè statu à contu nostru un sbagliu maiò chì parmette à sti razzisti di sentè si forti è patroni.
Quelli chì credenu di migliurà a so situazione parsunale accusendu u strangeru d’esse à l’origine di tutti i danni si sbaglianu di nemicu. Ùn sarà mai u travagliadore àrabu, purtughese o pulunese à culpisce I pari soi, à sfruttà altri travagliadori : quesse e manere sò quelle di i capitalisti di prima trinca, ch’elli sianu Corsi o nò, capitalisti chì si multiplicheghjanu è si danu in mudellu in tempu d’oghje.
Ùn si pò custruisce a sucetà bislingua appaciata di dumane pà noi patriotti di Manca senza apre ci à u plurilinguisimu chì face a Corsica di u 2015. À a crucivia di u Meditarraniu, tocca à a Corsica à firmà si una tarra di mischiu è micca una citadella etnica.
A Manca
Produit CORSU E RIBELLU
