Qualchi ghjorna fa, hè stata prisintata pà via d’una cunfaranza stampa, una dimarchja nova, chi poni a rivindicazioni naziunali corsa, à u pianu intarnaziunali.
A dimarchja si chjama « Iniziativa internaziunale per una via pulitica in Corsica IC-21 ».
Pona u fattu naziunali corsu a ‘ssu niveddu he impurtantissimu.
Pirmetti di fa cunoscia a rialta di a situazioni corsa. Pirmetti di popularizzà i rivindicazioni di i corsi pà campà in tarra soia. Pirmetti di sinsibilizzà mond’aghjenti ‘nant’a quistioni corsa. Pirmetti di truàa sustegni urganizzati chi poni andà da muvimenti à stati. Pirmettti di ramintà i dritti di u Populu Corsu arrubati in u sangu da a Francia piu di dui seculi fa.
« Iniziativa internaziunale per una via pulitica in Corsica IC-21 » urganizzighja una prima riunioni à l’assemblea di Corsica u vennari 12 di ghjunghju. Hè una cunfaranza e un dibattitu intarnaziunali. Ci so parecchji invitati fra quali Michel Rocard, anzianu primu ministru di a Francia, Josep – Lluis Carod – Rovira, anzianu prisidenti di a Generalitat di a Catalunia o Jean-uc Bennahmias, prisidenti di u Fronti Dimucratu. A riunioni purtarà ‘nant’à una « via corsa pà u seculu XXI ». Si sparti’cu u « think thank Alba Nova » e Corsica Libera.
Altri riunioni so privisti fora di Corsica.
Al di la di a riforma aministrativa francesa chi si traduci indé noi incù una missa in piazza di una cullittività unica, hè supratuttu a ricuniscenza comu Nazioni di a Corsica e di tutti i so dritti, fra quali quiddu di scedda da par idda u so distinu, chi primureghja. Voli dì chi ci so altri tappi à francà, è à vincia. Voli dì dinò chi ancu si a lotta s’adatta di novi formi o situazzioni, a Francia occupa sempri a Corsica.
Pà avali, s’aspetta sempri un dialogu francu e chjaru tra l’assemblea di Corsica e u guvernu francesu nant’à i punti maiori (statutu di risidenti, lingua corsa ufficiali, amnistia, ecc…) d’una nova andatura. S’aspetta sempri mentri cuntinuighja a riprissioni puliziera e ghjudiziaria contr’à i militenti e simpatizzenti naziunalisti. Una riprissioni chi circa à indibuliscia u muvimentu di a lotta di liberazioni naziunali… Un hè sola logica di ghjudici. Hè logica di Statu pa ammaistrà u cartulari corsu è fa svià so rivindicazioni…
Un ci voli mai à sminticà chi a storia culuniali francesa c’impara chi soli i rapporti di forza portani a pussibilità di ruttura incù u sistema di suttumissioni e di duminazzioni.
Di fatti hè impurtantissima a missa in ballu « Iniziativa internaziunale per una via pulitica in Corsica IC-21 » postu chi’dda pirmetti di fà escia da u quadru francesu a rivindicazioni naziunali corsa pa’ ponala ‘nant’à altri niveddi intarnaziunali induva si poni fà senta i pruposti pà una soluzioni pulitica e induva si pò fà cunoscia a rialtà di i so dritti naziunali sprupriati da a Francia.
U Populu Corsu, par via di a so storia, ha u drittu naturali a scedda u so avvena. Voli di chi t’ha u drittu a l’autodetirminazioni. E dunqua dinò a l’indipendenza.
Pa contu meiu portu tutt’a me amicizia e u me sustegnu à ‘ssa nova dimarchja chi speru s’allargarà pà purta a voci di un Populu e di i so dritti à campà libaru in tarra soia, in cori a u mari tarraniu e vicin’à l’Auropa.
U. SAULI.
Produit CORSU E RIBELLU
