S’hè spenta a nostra amica Teresia Travaglini di I Fulelli. Era a mamma di Petru Maria è Miché, surella di Felì, Gregoriu, Noncette è Marie Rose. Avìa 46 anni.
Teresia era un sustegnu fidu d’Arritti. Avìa travagliatu più di 18 anni à u serviziu di u nostru settimanale, partecipendu à tutte e nostre òpere, dendu di pettu à tutte e nostre difficultà, spartendu tutte e nostre gioie è rièscite. Era a nostra surella di lotta, hà cuntatu assai per Arrritti. Ùn avìa 17 anni quand’ella hà principiatu à mette manu in pasta pè u ghjurnale, partecipendu à purtà tutte e grande tappe di u settimanale, mà dinù à sustene e lotte di l’UPC, pò di u PNC.
In 2006, ci hà lasciatu per travaglià cù a so famiglia, firmendu à fiancu à noi. Avìa dinù una mana creativa a nostra Teresuccia è fabricava pe l’impresa famigliala, fiori è curonni funerarie.
Teresia era dinù un artista chì campava à mezu à musicanti. Avìa una bellìssima voce è era una di e troppu scarse donne à cantà nant’à a scena. Mà ùn a fecìa chì per accumpagnà ogni tantu u so fratellu, Felì, cù maraviglia.
Laca mondu ghjente adduluriti. Arritti pensa à i so figlioli, i so fratelli è surelle, cugnati, nipoti… è manda basgi affettuosi è fraterni à tutti i soi, parenti è amichi nè l’afflittu.
Riposi in pace o surella.
Produit CORSU E RIBELLU
