Mi scusareti pà issu titulu chi certi truvarani pruvucatoriu ma un mi pudiu impidiscia di scrivà cussì...
Un rimettu micca in causa tutta issa mossa ch’emu cunisciutu in Corsica dopu à i tarribuli attentati di i 7 e 8 ghjinnaghju. Si po capiscia, senza quantunqua sminticà ch’issa situazioni hè a cunsequenza d’issu cuntestu geopuliticu chi no cunisciumu in Mezzu Orienti e piu generalmenti in Africa e dinò in Asia incù a crescità di u muvimentu islamicu e djiadistu. A Corsica hè anch’idda cuncirnata da’ssa riflissioni pà avali pocu intrapresa… Saria po essa un bè di rinnuvà appena l’analisa patriotica nant’à a culunizzazioni di pupulamentu e i so sfarenti cunsiquenzii in Corsica. Saria piu che bè d’arradicà a sana rivindicazioni di populu corsu sola cumunita di drittu nant’a a noscia tarra. Ci vurraria à vultà nant’à issi punti.
Pà avali, par me, e pidendu a riazioni di Cameddu di Rocca Serra annant’à l’attaccu contr’à « Charlie Hebdo », mi socu appena intarrugata. U nosciu umuchju ha dittu : “Je condamne avec la plus grande fermeté l’horreur de cet acte barbare insupportable qui porte atteinte à la liberté de la presse et à la démocratie qui sont nos biens communs les plus chers. Les journalistes et policiers lâchement assassinés ce matin sont des martyrs de la liberté. Il est impératif que les auteurs de cette exaction soient retrouvés et traduits devant la justice. Un tel crime ne peut et ne doit pas rester impuni. »
Parlà bè u nosciu omu, ma comu avariu vulsutu senta, tinendu contu di certi prupurzioni, stessi pusizioni pà certi fatti passati in Corsica, o piu vicinu indé noi in Portivecchju ? L’ultima prova d’assassiniu ch’emu cunisciutu in a noscia città cuncirnaia un militanti puliticu cunisciutu pà u so ingaghjamentu ma dinò pà i so scritti. A cuntrariu di certi omini pulitichi prisenti durant’ a l’accolta danaanzi à a casa cumuna, Né cameddu di Rocca Serra né u merri di a città si so manifestati… Andeti à capiscia parchi issu silenziu …
Par me, postu chi un so micca « charlot », socu andata à manifistà comu mond’aghjenti di a città di u sali pà i morti di « Charlie Hebdo » e tutti l’altri. Ma socu andata dinò à l’accolta pa’ issi omini chi si battini pà a noscia tarra. Supratuttu quandu a so vita hè minacciata.
Comu l’avviu scritta l’altra volta saria bè chi una nova cuscenza patriottica sana si scittessi. Ma più che quissa, oghji saria tempu chi una cuscenza pupulari sana si scittessi in Corsica di pettu a tutti i trappuli missi in ballu contr’à noi.
Produit CORSU E RIBELLU
