(CorseMatin) Ùn hè tantu l’usu in sta rubrica, ma sta simana simu appena azezi. Forse appena niscentre dinù, ma à dilla franca ci n’hè una techja di vede ogni ghjornu in i media una puzza nasce in qualchì locu. Trà falsi dibattiti è deviazione ci hè sempre da beie è da manghjà.
Sti pochi tempi simu torna à parlà – o parlaccià – di stu capatoghju chì i nostri guvernanti si passanu trà d’elli dapoi 17 anni : e 35 ore. Sapete, quellu fruttu di a civilisazione di u piacè chì ùn hà da turnà à cambià, fora per ciò chì tocca à u so numeru. Eppuru, ci hè da crede chì à mumenti u soprappiù di travagliu chì ci hà da cascà à dossu, ùn u deveremu à i nostri guvernanti – puru s’elli sò ecunumisti boni boni – ma à l’ultimatum di i capizzoni di Bruxelles, a nostra nova capitale.
Intantu in Corsica, volta torna a quistione di a nostra, a capitale. Ott’ore di dibattiti per definì l’accampu di un uffiziu fundariu chì a Corsica aspetta da anni è anni. Anu solu rinvivitu i vechji amori di u campanilisimu è lasciatu poca piazza à u prublema di fondu : ammaestrà u fundariu quandu chì certi Corsi ùn ponu più campà nant’à sta terra.
Produit CORSU E RIBELLU
