(CorseMatin) « S’è vo ùn site Rumanu, omancu circate à esse ne degnu ». Durante seculi è seculi stu versu di Corneille purtò l’ambizione francese : esse l’erede di Roma, di a so putenza è, à le volte, di a so andatura altagna.
Luigi u XIVu, Napuleò o Clemenceau a si pruvonu, ognunu à usu soiu, ma scuntronu sempre sta petra à meza strada da fà li inciampà. È si n’hè firmata a Francia chjappa trà memoria è storia, inventendu ogni tantu qualchì cagione da crede ci sempre. Ch’ella sia de Gaulle, e culunie, o l’Europa.
Ma si sà chì a memoria hè cambiarina è ogni tantu s’imbuleghja ancu u fulcloru cù a realità. Ind’è noi, a festa religiosa di l’Immaculata Cuncezzione, chì casca l’ottu di dicembre, è forse pruclamata in lu 1735 ‘festa di a nazione’ – scurdata per un paghju di seculi – hè definita da una trentina d’anni cum’è festa – cummemurazione ? – naziunale. O omancu cum’è un ghjornu d’animazione in giru à a lingua è a cultura corsa in l’Educazione Naziunale.
Produit CORSU E RIBELLU
