(CorseMatin) Hè sempre cusì, quandu affaccanu l’elezzione ogni gruppu s’astrada. È da quì à un annu – o forse di più chì ancu quessa cambia cum’è e stagione – u chjassu i purterà fin’à e territuriale.
Basta à sapè s’è unepochi piglieranu u listessu crucivia.
Da una banda, i naziunalisti. Più chè mai divisi malgradu a ritirata di u Fronte chì ùn hà avutu nisun ribombu, nè trà d’elli, nè in i curridò di l’Elysée. Hà fattu quantunque cascà e mascare è i falsi argumenti di i partigiani di a disunione. Hà fattu ancu vede chì Corsica Libera vole – infine – esse à e manechje.
È avà ch’elli anu ricrutatu à Barbier è à Thiriez per incaricà si di a cumunicazione, à mumenti ùn vale mancu più a pena di batte a campagna. Intantu e municipale d’Aiacciu puderianu esse un primu matrimoniu naziunalo-naziunalistu ma per avà a sposa ‘Femu’ dice di nò. Da un’altra banda u scutinu serà ancu una prova per a diritta da attestà di u so rialzà.
Produit CORSU E RIBELLU
