Funu prisentati à e Ghjurnate Internaziunale i primi Quaterni di l’Indipendenza, prugettu di Corsica Libera in cullaburazione incù u Ribombu, chì hà cum’è scopu di priparà l’emancipazione naziunale di a Corsica chì s’avvicina incù publicazione periodiche in giru à temi precisi.
U primu Quaternu s’hè cuncentratu à sprufundà l’idee fatte è leste chì si ponu sente o leghje à prupositu di l’indipendenza : hè per quessa chì u so titulu hè 10 idee false annantu à l’indipendenza. L’idea era di mustrà incù sciffri è statistiche precise chì, innò, senza a Francia, ùn manghjerebbemu micca solu castagne, è tant’altre tuntie chì l’anti naziunalisti senza argumenti si campanu à lampà.
Hè un passu novu ch’ellu francu u muvimentu cù sti quaterni : fà esce una publicazione periodica di fondu annantu à u so scopu finale, l’indipendenza. Hè à tempu una manera di cunvince a ghjente chì dubbiteghja è di mustrà ch’ellu ci hè una vera ideulugia, arradicata è riflettuta, ind’è u muvimentu indipendentistu. Una bella prova di u travagliu chì hè fattu incù tutte e forze vive di u muvimentu, postu chì sti Quaterni sò stati messi in ballu da una squadra giovana, in giru à Petr’Antone Tomasi.
Issi militanti prisentonu i Quaterni à e Ghjurnate, è si pò dì chì u publicu fù sutisfattu assai da u risultatu. Tutt’ognunu s’hè accurdatu à dì chì u travagliu era di qualità è chì st’arnese novu averà un pesu impurtante in u cumbattu ideologicu ch’ellu porta Corsica Libera.
Certe persone chì ùn sò manc’appena indipendentiste si sò viste ascultà u dibattitu sott’à u tindone, cum’è Ghjuvan’Martinu Mondoloni o Manuella De Gentile. Affare ancu di più stunante : l’agiunta sucialista di a merria di Bastia hè vinuta à felicità i scrittori per u so travagliu è s’hè ancu fatta piglià in ritrattu incù u quaternu, imagine chì hà giratu annant’à tutte e rete suciale. Altra nuvità di stu prugettu : tutt’ognunu pò participà à a scrittura di i Quaterni ! Hè stata precisata parechje volte : quellu chì vole dà un’idea, purtà a so petra, a pò fà à traversu e rete suciale (Twitter, Facebook), scrivendu un mail à iquaterni@corsicalibera.com o per a posta, cuntattendu u Ribombu.
In fin’di contu, si pò dì chì a prima tappa di u travagliu di i Quaterni hè stata francata incù successu. Avà, s’aspitterà u mese d’ottobre per a prossima publicazione, 10 ragione per l’indipendenza. A squadra di i Quaterni si move per priparà u sicondu passu di stu caminu versu l’indipendenza !
Massimu Poli
Lire la suite sur U RIBOMBUProduit CORSU E RIBELLU
