« Cù a rientrata, a prima lezziò di l’annata purtava nant’à e mosse pulitiche oghjinche di l’Europa. Dopu e ricumpusizione di l’este dopu à u 1989, sò e minurità di u punente à caminà in demucrazia versu a so indipendenza.
Cum’è l’Americani à u Viet-nam, i paesi eurupei guardanu a Scozzia cun paura di l’effettu dominò è ch’ella diventessi a cara musa di l’altre regione. Autonome è ricche, seranu veramente eguiste è chjose nant’à a soia l’identità, o purteranu un veru prugettu cullettivu capace à custruisce e fruntiere nove di u cumunu ? Vicinu vicinu in Europa, corre una fiumara umana. In Barcelona, a Diada di l’11 di sittembre hà fattu u giru di tutte l’infurmazione. À difende a so libera spressione, millaie di chjocche in carrughju, cambianu u lugiziale di i Stati nazione è di e mosse indipendentiste dinù. Per l’identità, paesi cum’è a Spagna sò stati assai aperti.
Assai di più chè d’altri chè no cuniscimu. Durante i quaranta anni di franchisimu, sò state l’identità basche, catalane è l’altre dinù à dà fiatu à a resistenza, à a demucrazia è à u prugressu. E regione anu statuti di cuufficialità per e so lingue. Sò insignate in sistemi immersivi è i giovani sò più numerosi chè i vechji à parlà. D’altronde, parlanu tutti. Cunoscenu dinù a storia, a geugrafia eppò a biulugia postu ch’elli sò stati adattati i prugrammi à più di 50%. À parte una manata di famiglie, solu trè in Catalogna, a pupulazione ne vene cuntenta. Ancu l’immigrati sò felici di vede i so figlioli bislingui in listesse scole chè i Catalani à amparà cum’è elli, a lingua di u locu ch’anu sceltu per campà. «
Produit CORSU E RIBELLU
