Hà fattu di più rimore chè una notte turchina. Ognunu si n’hè avvistu, sti pochi anni u FLNC era digià à penciulà ma oramai u « canale addurmintatu » hà dipusitatu l’arme di modu ufficiale.
Eppuru, oghje ghjornu l’uppusizione trà a Corsica è Parigi hè à palesu. A lettera di u prefettu, e dichjarazione di u ministru di l’Internu pocu fà sò di quelli affari chì tempi passatoni l’averebbenu fattu tirà… i salti. Basta à sapè s’è a penciulata hà da durà è s’è l’altri gruppi clandestini seguiteranu, vistu chì u Statu ferma in modu ‘off’. A storia ci hà fattu vede chì un canale face sempre affaccà parechji fiumicelli.
Intantu, hè a fiumara chì pò ghjunghje in Aiacciu. In Bastia ùn avia aspettatu sta settimana, ci hè digià passata di marzu scorsu è s’hè schisatu l’inundazione.U fattu si stà chì a ritirata di u fronte à unepochi li casca cum’è u casgiu nant’à e lasagne è oramai ponu ancu cantà ‘tutti liberi tutti fratelli’. A fruntiera ufficiale trà i ‘duri’ è i muderati s’hè sguassata cù l’inchjostru di un cumunicatu.
Unione di i cumbattanti
Quelli chì ùn pesanu mancu 10 % di l’eletturatu anu fattu di modu chì e so idee sianu oghje maghjuritarie à l’assemblea di Corsica per purtà un prughjettu di sucetà. Anu creatu u cunsensu è si pò ancu avanzà nant’à un statutu d’autunumia, senza staccatura alcuna chì parenu sempre fole. Oramai scaricatu da a viulenza clandestina, u muvimentu indipendentistu publicu puderia ancu truvà e porte spalancate nant’à u so chjassu.
À dilla franca oghje ghjornu ognunu s’avvicina di u cursismu, qualessa sia a furmazione pulitica. È s’avvicina ancu u scutinu regiunale in un cuntestu appaciatu più chè mai. Dipusitendu l’arme, u FLNC-UC hà apertu un fronte puliticu è hà messu tutt’ognunu davant’à e so rispunsabilità.
Senza cumbattanti un’altra unione diventa pussibule è tandu cascheranu e mascare. Stu passu ‘storicu’ cù sta manu tesa puderia ancu fà affaccà un veru dialogu trà a Corsica è Parigi. Basta à sapè la piglià. Vennari chì vene tuccherà di sicuru à Marylise Lebranchu à fà cunnosce a pusizione nova di u Statu di pettu a stu cambiamentu maiò.
Intantu, a pudemu dì : À populu fattu, bisognu à aspettà.
Julian Mattei jumattei@corsematin.com
(…)
CorsicaInfurmazione.org by @Lazezu
Revue de Presse et suite de l’article :
sur Corse Matin, sur Alta Frequenza, sur RCFM, Sur Corsica, Sur le Journal de la Corse, Sur Alcudina, sur Corsica Infurmazione/Unità Naziunale, sur France 3 Corse, Sur Corse Net Info (CNI)
Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]
Produit CORSU E RIBELLU
