Assemblea di Corsica, u 14 di marzu di 2013 : dumanda a bocca posta da Mattea Lacave : Situazione di l’ONF per via di a vacanza di posti.
« O Sgiò presidente !
Dapoi 2002, sò state trasferite e fureste dumaniale à a Cullettività Territuriale di Corsica, è a gestione di stu patrimoniu tocca à l’ONF è a so Direzzione Regiunale.
Impiantatu nantu à u territoriu sanu, hè, u stabbilimentu, un attore di u mondu campagnolu è u so persunale chì, prisente nantu à u terrenu sin’à e zone più ritirate, participeghja cusì à a lotta contra a disertificazione di e cummune furestiere.
Eppuru, dapoi parechji anni, vede u stabbilimentu calà i so effettivi.
Oghje 95 funziunarii o à paru è 34 operai sò impiecati di l’ONF in Corsica, à l’iniziu di 2016 un Cuntrattu di pianu d’Ogettivu è di Perfurmanza Statu/ FnCOFOR ùn prevede più cà 85 funziunarii. Sta calata tamanta di l’effettivi averà cunsequenze strutturale è urganizaziunale nantu à u stabbilimentu ma dinò nantu à e missione regale pruposte à i pruprietarii furestierii di l’isula. Addebbulisce torna di più u travagliu lucale, caccendu l’impieghi pussibbuli per a nostra giuventù.
Oghje, i posti libari di funziunarii di a DR di Corsica sò chjappi per via di e mutazione. Ma i posti scantati di i paesi persi à mezu à e fureste isulane, ùn sò tantu preziati. U funziunariu tecnicu si ne stà trè anni à u più è chere un antra mutazione. Stu cappia è piglia face chì l’attività hè difficiule assai, chì a trasmissione di u sapè prufeziunale è culturale ùn hè più rispettata, chì a gestione hè scuntinua, chì u stabbilimentu è u pruprietariu ùn ci si ritrovenu micca.
Per regulà u prublema di sta vacanza cronica di i posti d’Agenti Patrimuniali, si puderebbe ricrutà giovani corsi sciuti da u trafilu furetieru di Liceu Agriculu di Sartè. Eppuru, l’impiegu di sta categuria di persunale funziunariu si face per via di cuncorsi naziunali (interni o esterni), è ferma dunque iputeticu per quelli chì campanu nantu à l’Isula. D’altronde, sò poche e piazze per un numaru altu di paticipanti. Hè cusì chì, in 2007, a Direzzione Regiunale di l’ONF di Corsica hà pussutu, da a prima CAP infruttuosa, impiegà Agenti Patrimuniali cuntrattuali isulani per risponde à stu prublema di a vacanza di i posti. Stu tippu di ricrutamentu ùn s’hè più fattu dapoi parechji anni ancu sì posti fermanu libari.
À u statu attuale, u ricrutamentu simulu seria u mezu più bonu di pudè offre à i residenti isulanu posti d’Agenti Patrimuniali, è d’appruntalli attempu à u cuncorsu naziunale ch’elli possinu diventà funziunarii.
Fà un ricrutamentu lucale da pruvede i posti à l’ONF corsica hè necessariu s’omu feghja e specificità suciale è ecunomiche di a sucetà corsa ma s’omu feghja dinò u rollu di l’ONF è a so piazza di gestiunariu di u patrimoniu furestieru isulanu.
Impiega l’ONF, un persunale qualificatu, specializatu è cumpetente. Intervene ind’è sti ricrutamenti si deve fà segondu à una vulintà pulitica chì predicheghja u sviluppu di e perspettive prufiziunale in a cuntinuità di e furmazione pruposte nantu à u territoriu, particularamente à u Liceu Agriculu di Sartè, è chì permette d’integrà i so particularisimi.
Dumandemu dunque à u Cunsigliu Esecutivu ciò ch’ellu contu di fà per facilità l’impiegu di residenti isulani à l’ONF
A ringrazià vi »
Femu A Corsica
Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale] Vous aimez cet article ? Faîtes-en profiter vos amis !
Produit CORSU E RIBELLU
