Sò, avà, parechji anni (forse una vintena) chè a Corsica celebreghja a festa di a nazione l’ottu di dicembre. Stu ghjornu quì, manifestazione diverse nantu à a lingua è a cultura sò pruposte, à spessu, à i sculari (à u sensu largu). In fattu, l’ottu di dicembre curresponde à una festa religiosa. È per ciò chì tocca à a nazione corsa, fù pruclamata un…14 di lugliu.
Certe volte, u destinu pare assai stranu. Hà vulsutu chè u 14 di lugliu fussi, à tempu, e feste naziunale di Francia è di…Corsica. Tuttu u mondu cunnosce u 1789, quandu a Bastille fù pigliata. Tandu, stu ghjornu hè divintatu a festa naziunale. Ma, s’è no fighjulessimu trent’ anni, nanzu… U 14 di lugliu di u 1755, à u cunventu Sant-Antone di Casabianca (Orezza), a nazione corsa hè proclamata, cù Pasquale Paoli in tantu chè generale. U 14 di lugliu…34 anni nanzu a Bastille è 21 nanzu à l’Americani (u 4 di lugliu).
Tandu, s’ellu fuss’un altru ghjornu, si po pinsà, di sicuru, ch’ellu sariu statu sceltu per celebrà a festa di a nazione corsa. Ma, à l’epica di u riacquistu, ùn era pussibule (ne mancu avà). Forse, dumandà a a Francia di scambià u soiu (si po sunnià). Tandu, sò corsi l’anni, è, à pocu à pocu, l’ottu di dicembre hè divintatu u ghjornu di a festa di a nazione corsa. Parchì l’ottu ? Ghjè, dapoi u 1852, hè a festa di l’immaculata cuncezzione, una festa maiò in parechji cità cristiane (Liò cù a festa di i lumi per undettu). È tuttu u mondu cunnosce a leia trà a Vergine Maria, patrone di a Corsica, piazzata sottu à a so prutezzione, ghjustamente in u 1755, è i Corsi.
Un si pudia sceglie un altru ghjornu, ne u 15 d’aostu (Santa Maria) ne manca l’ottu di settembre (natività). Ùn fermava più, per tene una certa logica, à tempu religiosa è storica, chè di sceglie l’ottu di dicembre. Puliticu à principiu, stu ghjornu hè divintatu, oghje culturale cù manifestazione, cunferenze, debatiti intornu à a lingua è a cultura corsa. Un passu quantunque intaressantu, masimu per i nostri studienti.
Corsica Infurmazione, L’information Corse dans le Journal de la Corse
Vous aimez cet article ? Faîtes-en profiter vos amis !
Faites passer l’information autours de vous en cliquant sur :
Produit CORSU E RIBELLU
