(Unità Naziunale, Corsicainfurmazione.org, lutte de masse, publié le 17 avril 2025) In 2004, eramu prisenti à fianc’à l’associi antiripressivi d’u mondu sanu in Paese Bascu à u cungressu KALERA.
Stu cungressu avia sceltu u 17 d’Aprile, ghjurnata di u prighjuneru Palestinianu dapoi u 75, cum’è data per a ghjurnata internaziunale di i prighjuneri pulitichi. Oghje chì a guerra marturieghja sempre i populi è ch’a ripressione mena sempre più forte, tenimu à avè una pinsata maiò per tutti i populi in lotta. Pinsemu à l’inseme di quelli chì pattenu di a ripressione in fondu di le so cellule, ch’elle sianu Francese, Spagnole, o d’altrò. 21 annu dopu à u cungressu KALERA, a ripressione hà cambiatu di forma, ma hè sempre prisente. In Corsica è in Paese Bascu, bench’ella sia stata annunziata da u ministru di a ghjustizia francese a fine di u FIJAIT, cuntinueghjanu e cunvucazione è i prucessi. L’amende piovenu annant’à l’anziani prighjuneri pulitichi è i ghjovani Corsi à milioni d’Euri. Parechji patriotti Corsi è Kanak so incarcerati in Corsica, in Kanaky è per ste Francie in esiliu. Dapoi più di dui anni, sò sempre messi in esame un decina di patriotti corsi è sottumessi à un cuntrollu ghjudiziariu. Quasi ogni settimana, un ghjovanu corsu hè ghjudicatu per e manifestazione urganizate dopu à l’assassiniu d’Yvan Colonna da una manu armata da u statu. À tutte ste vittime d’una ripressione indegna è cuttidiana, lì mandemu u nostru sustegnu è l’assicuremu d’a nostra determinazione à luttà sempre per a so libertà è contr’à l’inghjustizie chì i culpiscenu. Nanzu di compie, u nostr’associu ramenta u so sustegnu à i nostri fratelli in lotta ind’u mondu sanu, in particulare à i nostri amichi Kanak : Tenite forte, spunterà prestu l’Alba di a Libertà, è lu so spirione purterà gioia è pace in li nostri paesi marturiati da u culunialisimu. Per compie annant’à qualcosa di più lietu, prighemu un felice anniversariu à u nostr’amicu Carlu Pieri, anzianu prighjuneru puliticu è vittima dapoi anni d’un veru accanimentu ripressivu. Libertà per tutt’i prighjuneri !
Associu Sulidarità
Journée des « prisonniers politiques », le contexte international et #Corse depuis 50 ans.
Produit CORSU E RIBELLU
