« Ùn cappieremu micca di pettu à una prova di più, di marginalisazione di a nostra identità » #LinguaCorsa #Corse

(Unità Naziunale – Lutte de Masse – Corsicainfurmazione.org – Publié le 26 novembre 2024) U STC sprime a so indignazione di pettu à a decisione ghjudiziaria ricente in appellu chì impedisce l’usu di a lingua corsa à l’Assemblea di Corsica è, dunque, in tutte e nostre stituzione isulane.

Sta decisione custituisce un’attaccu gravissimu contr’à a nostra identità culturale, i nostri diritti fundamentali è a ricunniscenza di a nostra lingua cum’è un elementu centrale di u nostru patrimoniu. Dipoi decennii, i Corsi si battenu per a salvezza è a valurisazione di a so lingua, minacciata da una pulitica centralizatrice chì nega a diversità culturale è linguistica. L’interdizzione d’adoprà u corsu in u core stessu di e nostre stituzione, induve si piglianu e decisione per l’avvene di u nostru populu, và contru à a nostra storia è à a nostra dignità. Denunciemu l’accanimentu di u Statu francese chì, cù a scusa d’una lettura strinta di a Custituzione, cerca à sguassà ciò chì custituisce l’anima di a nostra isula. St’accanimentu ghjudiziariu và contr’à i principii stessi di a demucrazia è di a diversità chì a Francia pretende difende nant’à a scena internaziunale. A lingua corsa ùn hè micca solu una quistione di cumunicazione. Hè u spechju di l’essezza, di i valori è di a trasmissione d’una cultura unica. Deve avè a so piazza sana è piena in i dibattiti publichi, soprattuttu à l’Assemblea chì riprisenta u populu corsu. Ricusà què, hè negà a nostra esistenza cum’è cumunità specifica in pettu à a Republica. U STC chjama à una mobilisazione generale di tutti i Corsi, ma dinò di tutti quelli chì difendenu i diritti di i populi à salvà a so lingua è a so cultura. Esigemu :

• A ricunniscenza ufficiale di a lingua corsa cum’è lingua cuufficiale.
• A fine di e misure discriminatorie contr’à u so usu in e nostre stituzione.
• Un veru dialogu cù u Statu da assicurà l’avvene di a nostra lingua è di a nostra cultura.

Ùn cappieremu micca di pettu à una prova di più, di marginalisazione di a nostra identità.

U STC serà sempre à fiancu à i Corsi per difende i so diritti è a so dignità. A nostra lingua hè viva è deve campà !
SINDICATU Dl I TRAVAGLIADORI CORSI

« Assemblée de Corse : la Cour administrative d’appel interdit l’usage du #Corse lors des débats » Revue de presse et réaction de Gilles Simeoni.