(Corsicainfurmazione.org, publié le 26 novembre 2024) Senza suspresa, a Corte amministrativa d’appellu hà cunfirmatu u fattu di pruibisce l’usu di u Corsu in tutti i scambii è dibattiti officiali in e stituzione corse, quant’è ch’ella sia sta sintenza una cundanna à morte di a lingua d’un Populu.
Una volta di più, è à l’incuntrariu di a maiò parte di e glottopulitiche auropee, u monolinguisimu di u Statunazione francese torna à nigà u sale di a nostra identità è a brama vechja di demucrazia linguistica è culturale sustenuta da una magiurità larga di i corsi. Di pettu à sta negazione più chè scandalosa, pruclamemu a legitimità storica di a nostra lotta à prò di a ricunniscenza di i nostri diritti storichi è d’un statutu d’ufficialità per a lingua corsa nant’à u territoriu isulanu. In stu cuntestu di scambiu principiatu di veranu 2022 trà a Corsica è Parigi è chì torna à ripiglià, fattu si stà chì ne simu oghje ghjornu à chì feremu nant’à una rivindicazione fundamentale liata stretta à appaghjà à una suluzione pulitica aspettata da più di un mezu seculu. Intantu, u Statu alloca invece a nostra lingua da disciplina sculare in un scornu orariu d’un spartitempu qualunque, quandu chì quì l’attesa generale ferma quella di l’avenimentu d’una sucetà bislingua. In stu 26 di novembre di u 2024, u versu di a nostra lotta ùn svia manc’à pena ; ferma quellu di rende à u Corsu à so dignità di sempre à tempu à u so usu di lingua d’un populu vivu. Per contu nostru, s’impone più chè mai l’urgenza d’un cuntrattu novu per a Corsica, integrendu un statutu di cuufficialità. A turneremu à dì ghjovi, à a sessione di novembre di l’Assemblea di Corsica. Lingua corsa officiale : à nome di st’ogettivu storicu maiò è di ciò ch’è no purtemu dipoi sempre, da naziunalisti corsi indiati, ùn cappieremu mai ! Ch’ella sia intesa quì, in Aiacciu, in Parigi è in altrò : a lingua corsa hè lingua d’un populu, lingua di tutti è lingua per tutti ! È cusì sia !
PNC
Produit CORSU E RIBELLU
