« Sola una vulinta pulitica è populare di i Sardi pò permette di firmà sta scimizi » #Corse

(Unità Naziunale – Lutte Internationale – Publié le 8 octobre) Core in Fronte era prisente in Cagliari, in Sardegna, à a mossa di prutesta contr’à a speculazione energetica.

Tutti i muvimenti indipendentisti sardi eranu quì :
Entula, Sardinia Natzione, IRS…
L’affare hè diventata pulitica cù un cunfrontu trà a ghjunta di Sardegna è u Guvernu talianu.
Più di 210000 persone anu firmatu una petizione pè dumandà l’arrestu di i prugetti smisurati.
A ghjunta sarda dumanda, ella, u muratoriu nant’à u sugettu.
E vechje centrale à carbone devenu chjode da quì à u 2030. Ma in Sardegna, daretu à a transizione energetica verde, ci hè una vulintà di speculazione incù gruppi capitalisti di u mondu sanu : America, Cina, Spagna, Israele, Francia…
A Sardegna produce, digià, 38% d’energia in più pè i so bisogni.
U Guvernu talianu dumanda chì a parte di a Sardegna in energia verde sia in u 2030 di 6,2 GW. Ma oghje ci sò più di 800 prugetti, in terra cum’è in mare, pè una putenza di 54,39 GW.
A quistione hè pè chì fà è pè quale,cù un risicu maiò pè l’ambiente, e terre agricule è a salute?
Chì mudellu di sviluppu ci vole pè a Sardegna? Dopu esse stata un basa militare hà da diventà una centrale elletrica pè purtà l’energia in l’Italia industriale di u Nord ò di u Centru?
U sole è u ventu di Sardegna anu da esse in i mani ecunomichi strangeri?
L’energia hè diventata, in Auropa, un scopu è un arnese pè e multinaziunale, ma ancu i maffiosi, è a Sardegna hè oghje un terrenu speculativu.
Sola una vulinta pulitica è populare di i Sardi pò permette di firmà sta scimizia.

Core In Fronte