(Unità Naziunale – Lutte de masse – Publié le 26 juillet 2021) A Sardegna, in particulare a pruvincia oristanese, hè culpita da i fochi. Sò oramai sdrutti 20.000 ettari, runzicati da e fiare, frà i quali parechje splutazione agricule.
Per disgrazia, u populu corsu cunnosce u prezzu di quesse e strage : à u distrastru eculogicu, s’aghjustanu e perdite materiale, u periculu per e vite umane, è di modu più prufondu, l’offese, di e volte eterne, à a tarra : un pezzu di i nostri populi, di noi stessi.
In issi mumenti foschi, Corsica Libera vole assicurà u populu sardu di u so sustegnu fraternu.
Aldilà di sta sulidarità chì vene naturale, Corsica Libera vole pone di novu a quistione di i mezi di lotta contr’à l’incendii ind’un ambiu mediterraniu espostu assai à issi risichi.
À l’ora chì u GIEC (Gruppu di sperti interguvernamentale nantu à l’evuluzione di u clima) s’appronta à rende un raportu novu nantu à l’effetti di u riscaldamentu climaticu, tocca a Corsica quant’è à a Sardegna ad avè i so mezi propii è adatti à isse sfide nove.
Hè in stu sensu chì, digià in u 2017, l’eletti di Corsica Libera avianu cuntribuitu assai à fà vutà da u Cunsigliu corsu-sardu una resuluzione di l’inseme di i capigruppi parlamentari di e duie isule da ottene mezi aerii mutualizati nantu à u so spaziu cumunu, quessa cù una messa à dispusizione di mezi pusiziunati direttamenti nantu à e base di Corsica è di Sardegna.
Hè una necessità di scrive, à l’avvene, a cuuperazione corsu-sarda cum’è una sfida maiò di a pulitica di u futur Serviziu d’incendiu è di succorsu (SIS) di Corsica, chì ùn hè ancu à nasce più di 3 anni dopu à a creazione di a Cullettività unica.
Infine, in quantu à a maestria di issu settore strategicu per a Corsica, Corsica Libera dumanda chì a basa di Vintisari-A Sulinzara, vistu a vicinanza geugrafica, possi esse mubbilizata da basa uperaziunale di lotta contr’à l’incendii per e duie sponde di i Bucchi di Bunifaziu.
U distinu di issu pezzu di tarra corsa ùn pò esse di ghjuvà, à l’eternu, di campu di priparazione è di puntu di partanza per e forze militare francese à prò di a so pulitica neoculuniale. U so usu à prò di una missione d’intaressu publicu saria tandu a prima tappa di un riacquistu d’issu locu da a Corsica è u so populu.
Corsica Libera
26 juillet 2021
Produit CORSU E RIBELLU
