(Unità Naziunale Publié le 2 janvier 2019) L’annu scorsu ci hà purtatu i so mumenti d’allegria è di sperenza, ma dinù tempi di dulore è di pena incù quelli chì si ne sò andati ; amichi, parenti militanti è omi ch’anu scrittu a storia muderna di a Corsica.
L’annu novu chì sbuccia purterà a memoria d’issu tempu andatu è a vulintà d’un populu di campà arrittu per fà di a Corsica una terra di pace è d’armunia.
Corsica Libera cuntinuerà u so cumbattu pè a liberazione di tutt’i prighjuneri pulitichi, pè a ghjustizia suciale, è per a Pace. Ma ùn ci pò esse pace senza libertà, è ùn ci pò esse libertà per u populu senza libertà per a nazione.
Avanzeremu in sti tempi novi pè fà chì a Corsica ammaestri torna a so Storia, è chì a nostra sucietà sia quella di l’Umanu supranendu u prufittu, di tutti quelli chì campanu a so lingua è a so identità cum’è una carta maestra arrechendu scambii, spartera è richezza.
Corsica Libera, à nome di tutt’i so militanti prega à tutt’i Corsi, à tutti quelli chì si ricunnoscenu ind’è st’avvene cumunu, un’ annu novu di spannamenti, di creazione è di Pace.
Per tutti quelli chì strazieghjanu, per a nostra ghjuventù, per u nostru avvene à tutti, chì u 2019 sia u tempu d’una lotta allegra è determinata, da purtà Pace, saluta, gioia, è libertà in Corsica è ind’è u mondu sanu.
Corsica Libera
2 janvier 2019
Produit CORSU E RIBELLU
