A u mumentu induva ugnunu manda i so auguri pà l’anni chi sbucca, vurrariu mandà à issu ghjuvanottu in greva di a fami dapoi parecchji sittimani un missaghju di spiranza chi pudaria teni in una parola : LIBARTÀ !
A socu comu monda chi ci sò ghjà passati, comu monda a campani sempri avali, cio ch’idd’hè l’inghjustizia di a prighjò, cio ch’idd’hè a rialtà di a stituzzioni chi si chjama ghjustizia. Lisandru ci ramenta chi ogni omu, ancu da u fundu di i prighjò t’hà i so dritti, frà i quali u dritttu à u rispettu di a nucenza .
A socu parchì, incù d’altri ci semu dighjà battuti pà ch’iddi sighini rispittati i nosci dritti di ditinuti è di patriotti corsi. E oghji dinò Lisandru ci porta annant’à issa strada d’omini curaghjosi ch’ùn calani u capu davant’à l’inghjustizia di i scuri carcerii, quandu uni pochi sò duvintati pentiti, cullaboratori o traditori…
Mantinutu pà forza in esiliu, ùn pudaraghju essa fisicamenti accant’à voi u 2 di ghjennaghju, mà pudeti essa sicuri chi vi portu tuttu u mè sustegnu. Vurrariu dinò ramintà à ugnunu chi prighjuneri corsi mal trattati ci sò sempri, ch’iddi sighini in Marseglia o in Parighji, è oghji chi ghjè oghji ùn si senti quasgi più nudda dipoi i primi avvicinamenti…
Lisandru hè un asempiu di lotta, di forza è d’avvena pà quiddi chi ricusani i trattamenti d’eccezzioni in i prighjò di Francia. Sè un asempiu chi nutrisci tutti quiddi chi si battini pà’ ch’iddi siani rispitatti è ricunsciuti i dritti di l’omu, in a vita di tutti i ghjorna. Si un asempiu di fierezza pà a Corsica chi voli campà ritta !
Voddu dino salutà a famidda di Lisandru è u rispettu ch’idda c’ispira. Lisandru prestu vinarà u to ghjornu di ghjustizia, à mezz’a i toi, è libaru comu omu devi essa.
LIBARTÀ !
Ulivieru SAULI (militenti indipendentistu assignatu à risidenza in Parighji)
Vous aimez cet article ? Faîtes-en profiter vos amis !
Faites passer l’information autours de vous en cliquant sur :
Produit CORSU E RIBELLU
