(Unità Naziunale – 13 novembre 2017 – 06h00) 30 anni dighjà chi ti ne sé andatu.
Franchendu un altru passu, quiddu di u to sacrifiziu dop’à avè sceltu a dura strada di a risistenza ammachjata. Di ‘ssa notti bughja d’issu 15 di nuvembri di l’annu 1987, ferma pa’ me ‘ssu amaru ricordu chi si partutu troppu prestu, omu sputicu e curaghjosu ch’eri, sempri prontu à marchjà di fronti contr’à l’inghjustizia chi culpiva a noscia tarra.
L’idea chi tu pisavi comu bandera ci parlaia d’una Corsica libara.
Com’è tant’altri tandu, suniavi chi u to populu natu di tanti lotti e patimenti umani, guardianu di lingua e di cultura storichi, puddia spannà solu solu, maestru di u so avvena.
Suniavi chi, in cori di u Mari Tarreniu, u to paesu s’arrizaia comu Nazioni suvrana . Tinivi à menti chi in u seculu XVIII, tandu a Corsica era indipendenti è u Statu purtava dighjà i valori di a dimucrazia.
A Corsica suttumissa ti disprizzava. Di pettu à a summissioni, hai purtatu cun d’altri a to rabbia incù u to cori. Sé duvintatu macchjaghjolu.
Issu 15 di nuvembri 1987 l’omu chi tu eri hè statu richjamatu accant’à Diu.
Dapoi, ogni passu di cumbattenti suveta a to strada . Ma piu che què, i to sogni di libartà e di ghjustizia sò duvintati a rialtà di milliaia e milliaia d’aghjenti chi si facini senta.
O Ghjuvan Battì, un hè vanu u to sacrifiziu chì hai suminatu a grana di u campà libaru pà ugnunu.
Oghji chi ghjè oghji, pò dassi chi i tempi novi arradicarani a paci e a custruzzioni. Ma cuntinuighja a risistenza populari è cuntinuarà sin’é à chi a Corsica ritruvessi tutti i sò dritti.
U to sangu virsatu ha nutritu i vena di a vita e a to diritezza hè un asempiu pa ‘ quiddi chi volini una suciità sana .
Sé u cumpagnu di ogni donna, di ogni omu, e di ogni ziteddu chi oramaï in u campà di tutti i ghjorni sprimani a Corsica d’oghji è di dumani. Sé u cumpagnu, incu tutti l’altri patriotti partuti com’è té, d’issa cuscenza populari di libara subranità è di ghjusta dimucrazia.
Si sempri à fiancu à tutti !
A te Ghjuvan Battista Acquaviva.
Ulivieru Sauli
Produit CORSU E RIBELLU
